एजेन्सी । लामो समयदेखि भारतमा सबैभन्दा धनीको ताज पहिरिँदै आएका रिलायन्स इन्डष्ट्रिज लिमिटेडका अध्यक्ष मुकेश अम्बानी दोस्रो नम्बरमा झरेका छन् । मुकेशलाई पूर्वाधार व्यवसायी अदानी ग्रुपका अध्यक्ष गौतम अदानीले पछि पार्दै भारतकै धनी व्यक्तिको ताज पहिरिएका छन् ।

गौतम हुरुन भारतको धनी सूचीमा पहिलो स्थानमा पुगेका हुन् । ६२ वर्षिय गौतमको सम्पत्ति ९५ प्रतिशत बढेर ११६१८०० करोड भारु पुगेको छ । झण्डै दुई वर्षअघि विश्वकै तेस्रो धनी बनेको गौतम हिडनबर्गले सेयरमा घोटला गरेको रिपोर्ट सार्वजनिक गरेपछि उनको सम्पत्ति भारी गिरावट आएको थियो । हिडेनबर्गको रिपोर्ट सार्वजनिक हुनुअघि पनि गौतमले मुकेशलाई पछि पारेर विश्वकै तेस्रो धनीको सूचीमा परेका थिए । पछिल्लो समय गौतमको सम्पत्तिमा भारी वृद्धि भइरहेको छ ।

हुरुनको प्रतिवेदनमा भारतमा गत वर्ष हरेक ५ दिनमा एक नयाँ अर्बपति थप भएको उल्लेख गरेको छ । सम्पत्ति गणना गत जुलाइ ३१ सम्मको हो ।

विश्वको पाँचौ ठूलो अर्थतन्त्र भारत एसियाको धनी सिर्जनाको इन्जिनको रूपमा देखिएको छ । भारतको अर्थतन्त्रको आकार ३८ खर्ब डलर पुगेको छ । विश्वको दोस्रो ठूलो अर्थतन्त्र भएको चीनमा अर्बपतिको संख्यामा २५ प्रतिशत घटेका बेला भारतमा भने बढेको छ । यसबीचमा भारतमा अर्बपतिको संख्या २९ प्रतिशत बढेर ३ सय ३४ पुगेको हुरुन भारतका संस्थापक र प्रमुख अनुसन्धानकर्ता अनास रहमान जुनैदले बताएका छन् ।

हुरुनका अनुसार ६७ वर्षिय मुकेश १०१४७०० करोड भारु सम्पत्तिको साथ २०२४ को हुरुन इन्डिया रिच लिस्टको दोस्रो शीर्ष स्थानमा झरेका छन् । यसबीचमा मुकेशको सम्पत्ति २५ प्रतिशत बढेको हुरुनले जनाएको छ ।

यस्तै ७९ वर्षका शिव नाडर र एचसिएल टेक्नोलोजी र परिवारको सम्पत्ति ३७ प्रतिशत बढेर ३१ खर्ब ४० अर्ब भारुका साथ तेस्रो स्थानमा छन् ।

यस्तै कोभिड खोप निर्माता साइरस सेरम इन्स्टिच्युट अफ इन्डियाका ८३ वर्षिय एस पूनावाला र परिवार सूचीमा चौथो स्थानमा छन् । पुनवालाको सम्पत्ति ४ प्रतिशत बढेर २८ खर्ब ९८ अर्ब भारु पुगेको छ ।

सन फार्मास्युटिकल इन्डस्ट्रिजका दिलीप सांघवी पाँचौ स्थानमा छन् । ६८ वर्षिय संघावीको सम्पत्ति ५२ प्रतिशत बढेर २४ खर्ब ९९ अर्ब भारु पुगेको छ ।

यस्तै आदित्य बिडला ग्रुपका ५७ वर्षिय कुमार मंगलम बिडला र परिवारको सम्पत्ति ८७ प्रतिशत बढेर २३ खर्ब ५२ अर्ब भारु पुगेको छ ।

हिन्दुजा ग्रुपका ८४ वर्षका गोपीचन्द हिन्दुजा र परिवारको सम्पत्ति ९ प्रतिशत बढेर १९ खर्ब २७ अर्ब भारु पुगेको छ । एभिन्यु सुपरमार्केटका ६९ वर्षका राधाकृष्ण दामिनी र परिवारको कूल सम्पत्ति ३३ प्रतिशत बढेर १९ खर्ब ९ अर्ब भारु पुगेको छ ।

नवौं स्थानमा रहेका विप्रोका ७९ वर्षिय आजिम प्रेमजी र परिवारको सम्पत्ति २४ प्रतिशत बढेर १९ खर्ब ७ अर्ब छ । यस्तै १० औं स्थानमा निरज बजाज र परिवारको सम्पत्ति ३५ प्रतिशत बढेको छ । ६९ वर्षका बजाजको कूल सम्पत्ति १६ खर्ब २८ अर्ब भारु पुगेको हुरुनले जनाएको छ ।

हुरुनका अनुसार विगत पाँच वर्षमा छ व्यक्तिहरू लगातार भारतको शीर्ष १० मा रहेका छन् । सूचीमा गौतम अडानी र परिवार, पछि मुकेश अम्बानी, परिवार, शिव नाडर, साइरस एस पूनावाला र परिवार, गोपीचन्द हिन्दुजा र परिवार र राधाकिशन दामानी र परिवार भारतमा सबैभन्दा कान्छो अर्बपति भएका छन् ।

हुरुन भारत धनी सूचीमा सबैभन्दा कान्छो ६ अर्ब डलर भएको स्टार्टअप जेप्टोका २१ वर्षीय कैवल्य वोहरा हुन् । कम्पनीका सह संस्थापक २२ वर्षीय अदित पालिचा सूचीमा दोस्रो कान्छा हुन् ।

पहिलो पटक भारतीय चलचित्र अभिनेता शाहरुख खानले इन्डियन प्रिमियर लिग (आइपिएल) टोली कोलकाता नाइट राइडर्समा आफ्नो होल्डिङको बढ्दो मूल्यका कारणले हुरुन इन्डिया रिच लिस्टमा स्थान बनाएका छन् । खानको सम्पत्ति ७३ अर्ब भारु छ । यस्तै उनको आफ्नै प्रोडक्सन हाउस रेड चिल्ली इन्टरटेनमेन्टले पनि सम्पत्ति बढाउन महत्वपूर्ण भुमिका खेलेको बताइएको छ ।