काठमाडौं । निजी लगानीमा स्थापना भएको मुलुकको पुरानो औषधी उद्योग मध्यको एक टाइम फर्मास्युटिकल्स प्राइभेट लिमिटेडले साधारण सेयर (आइपिओ) निष्कासन गर्ने भएको छ ।

आइपिओ निष्कासनको तयारी भइरहेको टाइमले जनाएको छ । प्रस्तावित आइपिओ योजनाले पुँजीगत कोषमा वृद्धि हुने अपेक्षा गरिएको छ ।

आइपिओले ऋण निर्भरता घटाउने भएको उद्योगले जानकारी दिएको छ । भविष्यको कोष आवश्यकताको लागि पूँजी बजारमा प्रवेश गर्न लागेको हो । एन्टिबायोटिक्स, एन्टिकोल्ड, सप्लिमेन्ट्स, एनाल्जेसिक, एन्टिडायबेटिकसहित धेरै खण्डहरूमा जसले दिगो सहायता प्रदान गर्ने उद्योगले जनाएको छ । आइपिओ निष्कासन गर्न लागेको टाइम्स फर्मास्यिुटिकल्सको व्यापार बढ्दै गएको छ ।

यो वर्ष उद्योगको व्यापार १५.२० प्रतिशत बढेर ९४ करोड ७० लाख रुपैयाँ व्यापार गरेको छ । गत वर्ष टाइम्सको व्यापार ८२ करोड २० लाख रुपैयाँ थियो । एक वर्षको बीचमा उद्योगको औषधी व्यापार साढे १२ करोड रुपैयाँ बढेको सार्वजनिक गरिएको वित्तीय विवरणमा देखिएको छ ।

२०२२ मा ९९ करोड, २०२१ म ७९ करोड १० लाख रुपैयाँ व्यापार गरेको थियो । यस्तै २०२० मा ८६ करोड ६० लाख रुपैयाँ औषधी व्यापार गरेको थियो । २०१९ मा ६६ करोड ३८ लाख, २०१८ मा ७२ करोड र २०१७ मा ६५ करोड रुपैयाँ सञ्चालन आम्दानी गरेको उद्योगले सार्वजनिक गरेको वित्तीय विवरणमा उल्लेख छ । वित्तीय विवरण हेर्दा उद्योगको औषधी व्यापार वर्षेनी बढ्दै क्रममा छ ।

कम्पनीले औषधी बिक्री रणनीतिमा परिमार्जन गर्नुका साथै कोभिड महामारीको अन्त्य भएकाले उत्पादन तथा व्यापार दुबै बढेको जनाएको छ ।

टाइमले उत्पादन गर्ने औषधीको अहिले बजारमा माग बढेको र बजार हिस्सा पनि विस्तार हुँदै गएको छ । कम्पनीको मुलुकभर २ सय भन्दा बढी औषधी वितरणहरु रहेका छन् । जसमध्ये १० वितरकको हिस्सा २४ प्रतिशत हिस्सा रहेको टाइमले जनाएको छ । टाइमले ६० करोड ३२ लाख रुपैयाँ ऋणको रेटिङ गराएको छ।

कम्पनीले एन्टिबायोटिक, एन्टिकोल्ड, सप्लिमेन्ट, एनाग्लास्टिक र एन्टिडाइबेटिक औषधीहरु उत्पादन गर्दै आएको छ । औषधी उत्पादन गर्न कम्पनीले आवश्यक विभिन्न कच्चा पदार्थ र प्याकेजिङ्ग सामाग्रीहरु विदेशबाट आयात गर्दै आएको छ ।

नेपालमा धेरै औषधी उद्योग भएकाले आन्तरिक बजारमा औषधीमा प्रतिस्पर्धा देखिएको छ । टाइमले पनि आन्तरिक बजारमा प्रतिस्पर्धाको सामना गर्नुपरेको जनाएको छ । अहिले बजारमा ५० भन्दा बढी औषधी उद्योगहरु सञ्चालनमा छन् ।

नेपालको निजी क्षेत्रको पुरानो औषधी उद्योगहरुमध्ये एक टाइम सन १९९४ मा स्थापना भएको हो । उद्योगले १९९७ देखि व्यवसायिक रुपमा औषधी उत्पादन थालेको हो ।

टाइममा अल्फा क्यापिटलको १३, राजु कर्माचार्यको ९, झनकनाथ भट्टको ९ र नारायणबहादुर क्षेत्रीको ८ प्रतिशत हिस्सा रहेको छ ।