काठमाडौं । निजी लगानीमा स्थापना भएको सिंगटी हाइड्रो इनर्जी लिमिटेडको बनाउन लागेको ८६.५९ मेगावाटको लान्द्रुक मोदी जलविद्युत आयोजनालाई लगानी जुटेको छ । आयोजनामा माछापुच्छ्रे बैंकको अगुवाइसहित आधा दर्जन बैंकको १२ अर्ब २० करोड रुपैयाँ ऋण लगानी हुने भएको छ ।

आयोजनामा ग्लोबल आइएमई बैंक, एभरेष्ट बैंक, नेपाल एसबिआई बैंक, कृषि विकास बैंक र लुम्बिनी विकास बैंकको लगानी हुने भएको छ । आयोजना बनाउन कूल १६ अर्ब ४० करोड रुपैयाँ लागत अनुमान गरिएको छ । आयोजनामा बैंकहरुले ७५ प्रतिशत र बाँकी २५ प्रतिशत सिंगटी हाइड्रोसहित प्रवर्धक कम्पनीको लगानी हुने भएको छ ।

आयोजनाले बिजुली बेचेर वार्षिक ३ अर्ब ३४ करोड रुपैयाँ आम्दानी गर्नेछ । आइतबार आयोजनाको प्रवर्धक कम्पनी अन्नपूर्ण विद्युत विकासका कार्यकारी अध्यक्ष बटु लामिछाने र माछापुछ्रे बैंकको तर्फबाट बिनितकुमार झाले ऋण लगानी सम्झौतामा हस्ताक्षर गरेका छन् । सिंगटी हाइड्रोले दोलखामा २५ मेगावाटको सिंगटी खोला आयोजना सञ्चालन गरिरहेको छ ।

अन्नपूर्ण विद्युत विकासद्धारा प्रवद्र्धित लान्द्रुक मोदी आयोजना कास्की जिल्लाको अन्नपुर्ण गाउँपालिकामा पर्दछ । जलविद्युत विज्ञहरुका अनुसार यो आयोजना विश्वकै तेस्रो ‘हाई हेड प्रोजेक्ट’ र नेपालमा सबैभन्दा धेरै उचाइ भएको आयोजना भएको छ । उक्त आयोजनाको हेडवक्सदेखि विद्युतगृहसम्मको वास्तविक उचाई १४ सय १८ मिटर रहेको छ । नेपाली जलविद्युत आयोजनाहरुमा यो लेभलको उचाई सबै भन्दा धेरै हो ।

नेपाल विद्युत प्राधिकरणसँग यस अघिनै विद्युत खरिद सम्झौता (पिपिए) भैसकेको छ । वर्षातको ६ महिना प्रतियुनिट ४.८० रुपैयाँ र सुक्खायामको ६ महिनामा प्रतियुनिट ८.४० रुपैयाँमा पिपिए भएको हो । विद्युत प्राधिकरणले विद्युत उत्पादन भएको ८ वर्षसम्म वार्षिक ३ प्रतिशतका दरले पिपिएको मूल्य वृद्धि गर्दै जाने सम्झौता गरेको छ ।

आयोजनामा आगामी कात्तिकबाट भौतिक निर्माणको काम सुरु गर्ने प्रवर्धक कम्पनी अन्नपूर्ण विद्युत विकास कम्पनीका कार्यकारी अध्यक्ष बटु लामिछानेले बताए । निर्माण सुरु गर्न आयोजनाको ठेक्का प्रकृया अन्तिम चरणमा पुगिसकेको लामिछानेले जानकारी दिए ।

आगामी ४ वर्षभित्र निर्माण सम्पन्न गर्ने लक्ष्य लिएको कम्पनीले तोकिएको समय भन्दा अगावै विद्युत उत्पादन गर्नेगरी तयारी थालेको अध्यक्ष लामिछानेले जानकारी दिए ।