काठमाडौँ । असार १० बाट बन्द गरिएको मेलम्चीको पानी काठमाडौँ उपत्यकामा असोज १० गतेदेखि वितरणको तयारी गरिएको छ ।

बर्खा सुरु भएसँगै पानी धमिलो आउन थालेपछि गत असार १० देखि मेलम्चीको पानी ल्याउन बन्द गरिएको थियो ।

मेलम्चीको पानी नआउँदा काठमाडौैँमा पानीको अभाव भैरहेको छ । मेलम्चीको पानी आउन थालेपछि पानीको अभाव केही हदसम्म कम भएपनि विभिन्न कारणले गर्दा मेलम्चीको पानी नियमति काठमाडौँ नआउँदा समस्या हुँदै आएको छ ।

काठमाडौँ उपत्यकामा अहिले पानीको माग दैनिक ४७ करोड लिटर छ । सिन्धुपाल्चोकको मेलम्ची खोलाबाट दैनिक करिब २० करोड लिटर पानी ल्याउन लागिएको हो ।

उपत्यकामा दैनिक ४७ करोड लिटरको पानी माग भएपनि मेलम्चीको पानी बन्द भएपछि काठमाडौं उपत्यका खानेपानी लिमिटेड (केयूकेएल) ले विभिन्न स्रोतबाट जम्मा गरेर करिब १६ करोड लिटर पानी वितरण गर्दै आएको छ ।

केयूकेएलका अनुसार अहिले सुन्दरीजलबाट करिब ६ करोड लिटर मात्र पानी ल्याइएको छ । बाँकी पानी आन्तरिक स्रोतहरूबाट व्यवस्थापन गरिएको छ ।

केयुकेएलले पानीको उपलब्धता हेरेर कतै दिन बिराएर त कतै आवश्यकताअनुसार वितरण गरिएको हो ।

पानी कम हुँदा नियमति रुपमा वितरण गर्न नसकेको केयुकेएलले जानकारी दिएको छ । मेलम्चीको पानी आएपछि नियमित वितरणमा समस्या नहुने बताइएको छ ।

०७८ असारको बाढीले मेलम्ची मुहान क्षेत्रलाई क्षति गरेपछि काठमाडौं उपत्यकामा निरन्तर पानी वितरण हुन नसकेको हो ।

सरकारले मेलम्चीको पानी काठमाडौंमा बाह्रै महिना ल्याउन मिल्ने गरी काम अघि बढाएको छ । जसअनुसार अहिले भएको स्थानबाट माथितर्फ सर्कथली क्षेत्रमा ८ सय मिटर दूरीमा इन्टेक सार्ने तयारी आयोजनाको छ ।

दोस्रो र तेस्रो चरणमा यांग्री र लार्के खोलाबाट थप १७र१७ करोड लिटर पानी ल्याइनेछ । तीन चरण गरेर दैनिक ५१ करोड लिटर पानी काठमाडौं ल्याउने योजना रहेपनि निर्माणको काम भने सुरु भएको छैन ।

मेलम्ची खानेपानीका लागि काठमाडौं उपत्यकामा १ हजार ७ सय किमि नयाँ पाइपलाइन विस्तार गरिएको छ।

मनसुन फेरि सक्रिय नभए र कुनै प्राविधिक समस्या नआएको खण्डमा असोज १० देखि पानी वितरणमा समस्या नहुने मेलम्ची खानेपानी विकास समितिले जानकारी दिएको छ ।

सुरुङ निर्माणमा संलग्न इटालियन ठेकेदार कम्पनी सीएमसीले आयोजनासँग सम्झौता तोडेको ६ वर्ष बिति सक्दा पनि स्थानीय सप्लायर्स र कामदारलाई दिनुपर्ने २७ करोडभन्दा बढी रकम भुक्तानी नदिँदा स्थानीय सप्लायर्सले आफ्नो रकम भुक्तानी नदिएसम्म काठमाडौं पानी लग्न नदिने अडान लिँदै आएका छन् ।

इटालियन कम्पनीले सन् २०१८ मा मेलम्चीको इन्टेक र बाँध बनाउने ठेक्का एकतर्फी रूपमा तोडेको थियो । निर्माणका क्रममा स्थानीय व्यवसायीसँग गरिएको सम्झौताबमोजिम खरिद गरेको निर्माण सामग्री र ढुवानी सेवाबापतको रकम बाँकी छाडी सीएमसी भागेको हो ।

यो पनि : 

असोजको पहिलो सातादेखि काठमाडौँमा मेलम्चीको पानी

मेलम्चीको पानी नआएसम्म वैकल्पिक माध्यमबाट काठमाडौँमा पानी वितरण गर्न निर्देशन

बाढी आउन थालेपछि मेलम्चीको पानी बन्द

मेलम्चीको पानी बाह्रै महिना राजधानी ल्याउन साढे ४ अर्ब लाग्ने

मेलम्चीको पानी बाह्रै महिना वितरण गर्न ‘हेडवर्क्स’ स्थानान्तरणको तयारी