काठमाडौं । बाढी पीडितका लागि भाटभटेनी सुपरमार्केट्सका अध्यक्ष मीनबहादुर गुरुङले एक करोड ११ लाख ११ हजार १११ सहयोगको घोषणा गरेका छन् । गुरुङले   प्रधानमन्त्री केपी शर्मा ओलीमार्फत्  बाढी पीडितको उद्धार र राहतका लागि सो सहयोग प्रदान गर्न लागेको जनाएका छन् ।

बिहिवारदेखि परेको अविरल वर्षाका कारण देशमा हजारौँ नागरिक घरवार बिहीन सयौँको ज्यान गएको भन्दै  उनले सरकारी राहत कोषमा सहयोग जम्मा गर्न लागेको बताए ।

भाटभटेनीका सीओओ पानु पौडेलले अध्यक्ष गुरुङले घोषणा गरेको रकम छिट्टै सरकारलाई हस्तान्तरण गरिने बताए ।

मुलुकलाई अप्ठेरो परेको बेलामा सहयोग गर्नु नागरिकको दायित्व हुने धारणा राख्ने गुरुङले यसअघि डा. भगवान कोइरालाको नेतृत्वमा रहेको बाल अस्पताल निर्माणका लागि ४१ करोड रुपैयाँ, जाजरकोटमा गएको भूकम्पपछि उनीहरुको उद्धार र राहतका लागि एक करोड ११ लाख ११ हजार १११ रुपैयाँ र ८० लाख रुपैयाँबराबरको खाद्यान्न सहयोग गरेका थिए ।

कोभिडका बेला पनि संघीय सरकारसहित सातै प्रदेशमा सहयोग गरेका गुरुङले २०६८ सालमा त्रिवि शिक्षण अस्पतालमा दुई वटा भवन निर्माण गरिदिएका छन् । ११ करोड लागतमा इमर्जेन्सी भवन र १५ करोड लागतमा ईएचएस भवन गुरुङले तयार पारीदिएका छन् ।

त्यस्तै गरीब जेहन्दारका छोराछोरी १४ जनालाई एमबीबीएसको अध्ययन सम्पूर्ण खर्च भाटभटेनीले नै बेहोरेको थियो । उनीहरूले सो बापत् केवल स्थानीय तहमा जनताको सेवा गर्ने प्रतिबद्धता दिएका थिए ।