काठमाडौं । नेकपा (माओवादी केन्द्र) का वरिष्ठ उपाध्यक्ष नारायणकाजी श्रेष्ठले नेपालले भारत र चीन दुवै छिमेकी मुलुकसँगको सम्बन्धलाई प्राथमिकताका साथ अघि बढाउनुपर्ने बताएका छन् ।

उनले मुलुकको आर्थिक समृद्धिको कार्यभारलाई पूरा गर्न पनि सरकारले भारत र चीन दुवै मुलुकसँगको सम्बन्धलाई समानतामा आधारित भएर प्राथमिकताका साथ अघि बढाउनुपर्ने बताएका हुन् ।

शनिबार काठमाडौंमा आयोजित नेपाल–भेनेजुयलामैत्री संघ घोषणा कार्यक्रममा बोल्दै वरिष्ठ उपाध्यक्ष श्रेष्ठले नेपालले जहिले पनि राष्ट्रिय हितलाई केन्द्रमा राखेर अन्य देशसँगको सम्बन्धलाई अघि बढाउनुपर्ने पनि स्पष्ट पारे । उनले विश्व राजनीतिक एशिया केन्द्रित भइरहेकाले नेपालले पनि भूराजनीतिक संवेदनशीलतालाई बुझेर परराष्ट्र सम्बन्धलाई अघि बढाउनुपर्ने बताए । देशको राष्ट्रिय हितलाई केन्द्रविन्दुमा राखेर अगाडि बढ्ने र सबैसँग मैत्रीपूर्ण सम्बन्ध राख्ने नीतिलाई नेपालले अघि बढाउनुपर्ने वरिष्ठ उपाध्यक्ष श्रेष्ठले बताए ।

उनले भने, ‘हाम्रो देशको कुराकानी गर्दा हामी हाम्रो देशमा विशेषतः हामी दुई वटा छिमेकसँगको सम्बन्धलाई प्राथमिकता दिन्छौं । हामी भारत र चीनसँगको सम्बन्धलाई प्राथमिकता दिन्छौं । र, उनीहरुसँग मैत्रीपूर्ण, समानतामा आधारित मैत्रीपूर्ण सम्बन्ध कायम गर्न चाहन्छौं । कुनै एउटासँग घनिष्ट सम्बन्ध, अर्कोसँग अलि दूरीको सम्बन्ध हामी त्यसको पक्षमा छैनौं । मुख्यतः हामी भारत र चीन दुवैसँग मैत्रीपूर्ण सम्बन्धलाई अगाडि बढाउन चाहन्छौं ।

र त्यो मैत्रीपूर्ण सम्बन्ध हाम्रो स्वभाविक रुपमा समनिकटताको आधारमा हुन्छ दुवै देशसँग समानताको आधारमा हुन्छ । तर हाम्रो देशको राष्ट्रिय सार्वभौमिकता, भौगोलिक अखण्डता, स्वधिनता, स्वाभिमान र हितको पक्षमा हामी जहिले पनि बोल्छौं, अडान लिन्छौं । र हामीले आफ्ना राष्ट्रिय हितको पक्षमा उभिदाखेरी अरु कुनैपनि देशले आफ्नो देशको विरुद्धमा गतिविधि गर्यो भन्न मिल्दैन । त्यो देशले पनि आफ्नो सार्वभौमिता र राष्ट्रिय हितको पक्षमा त बोलिहाल्छ ।

त्यसकारण हाम्रो कुरा के हो भने हामी हाम्रो छिमेकीहरुसँग राम्रो सम्बन्ध अघि बढाउन चाहन्छौं । हामी अरु मित्र राष्ट्रहरुसँग पनि राम्रो सम्बन्ध अघि बढाउन चाहन्छौं । त्यसैले त्यो समानतामा आधारित जो हाम्रा मैत्रीपूर्ण सम्बन्धको आधार हो । त्यसको आधारमा हामी सबैसँग मित्र सम्बन्ध राखेर अगाडि बढाउन चाहन्छौं । र त्यसो गर्यो भने मात्रै अहिले जो नेपालको मुख्य कार्यभार आर्थिक समृद्धिको कार्यभार हो । त्यो समृद्धिको कार्यभार पूरा गर्न सकिन्छ । अहिले विश्व विस्तारै सबैले देखिराखेको छ । सम्पूर्ण विश्वको बदलिँदो परिस्थिति एशिया केन्द्रित हुँदै आईराखेको छ ।

दोस्रो भूराजनीतिले विश्वमा अत्यन्तै ठूलो प्रभाव पार्र्दै लगिराखेको छ । र हाम्रो देश जुन भूराजनीतिक अवस्थितिमा छ । त्यसले पैदा गरेको सम्बेदनशीलता र चुनौतिहरु गम्भिर छन् । हामीले स्वतन्त्र परराष्ट्र नीति अवलम्बन गर्ने, हामीले पञ्चशीलको मान्यतालाई अवलम्बन गर्ने, संयुक्त राष्ट्र संघको बडा पत्रलाई मूल आधार बनाउने, असंलग्नतालाई स्वीकार गर्ने र आफ्नो देशको राष्ट्रिय हितलाई केन्द्रविन्दुमा राखेर अगाडि बढने र सबैसँग मैत्रीपूर्ण सम्बन्ध राख्ने नीतिलाई अगाडि बढाउनु पर्दछ । यसलाई हामीले कन्द्रविन्दुमा राखेर यसमा विचलित नभई अरुसँग मैत्रीपूर्ण सम्बन्ध हामी राख्न चाहन्छौं ।’

वरिष्ठ उपाध्यक्ष श्रेष्ठले स्वतन्त्र परराष्ट्र नीति नेपालले अवम्बन गर्दै आएको र त्यसमा कतिपनि विचलित हुन नहुने बताए ।