काठमाडौं । प्रधानमन्त्री केपी शर्मा ओलीकै कारण सोमबारको विहानको मन्त्रीपरिषद् बैठक ढिलाई हुन गएको खुलेको छ । आइतबार राती नै मन्त्रिपरिषद बैठक सोमबार बिहान बस्ने सूचना मन्त्रिहरुलाई जारी गरे पनि प्रधानमन्त्री ओली बैठक तोकिएको समयमा नै उपस्थित हुन नसक्दा मन्त्रीपरिषद् बैठक ढिलाई भएको हो ।

बैठक ढिलो बस्दा पूर्वसभामुख दमननाथ ढुङ्गानाको सम्मानमा सरकारले सार्वजनिक विदा घोषणामा ढिलाइ गर्यो । सार्वजनिक विदा घोषणामा भएको ढिलाइले स्कुल गएका शिक्षक र विद्यार्थी, कर्मचारी र बैंकका कर्मचारीहरु कोही कार्यालय पुगेका थिए भने कोही बीच बाटोमा पुगेका घरमा फर्कनु पर्यो ।

प्रधानमन्त्री तथा मन्त्रीपरिषदको कार्यालयबाट आइतबार राती ११ बजे नै सूचना जारी गर्दै सोमबार मन्त्रीहरुलाई बिहान ७ः३० बजे मन्त्रीपरिषद् बैठक बस्ने जानकारी दिएका थिए । सोही बमोजिम मन्त्रीहरू पुगेका थिए ।

तर प्रधानमन्त्रीका प्रेस हेर्ने प्रकाश सिलवालले भने राति १० बजे पत्रकारहरूको ग्रुपमा भोलि प्रधानमन्त्रीका कार्यक्रम भनेर ९ बजेलाई मन्त्रिपरिषद बैठकको सूचना जारी गरेका थिए । प्रधानमन्त्री ओली पनि सोही अनुसार ९ बजेमात्र बैठकमा उपस्थित भएका थिए । यस अन्योलताले पनि बैठक बस्न ढिलाई भएको हो ।

सरकारका सबै मन्त्रीहरु काठमाडौंमै थिए भने नेपाली कांग्रेस सभापति शेरबहादुर देउवा र परराष्ट्रमन्त्री आरजु राणा देउवा धनगढीबाट आइतबार साँझ ६ः३० बजेको हवाई उडानमार्फत काठमाडौं आएका थिए ।

ढिलागरी बसेको मन्त्रीपरिषद् बैठकले पूर्वसभामुख ढुङ्गानाको निधनको शोकमा सोमबार सार्बजनिक बिदा दिने निर्णय गर्यो । सरकारका प्रवक्ता तथा सञ्चार तथा सूचना प्रविधि मन्त्री पृथ्वी सुब्बा गुरुङले उक्त बैठकका निर्णयहरु बिहान ९ः३० बजे सार्वजनिक गरे ।

सरकारको सार्वजनिक विदाको निर्णयहरु सार्वजनिक भईसक्दासम्म सरकारी कार्यालय खुलिसकेका थिए भने कर्मचारी कार्यालय पुगिुकेका थिए । प्रधानमन्त्रीले समयको वास्ता नगर्दा कार्यालय पुगिसकेका कर्मचारी घर फर्किन बाध्य भए ।

पूर्वसभामुख ढुङ्गानाको निधनसँगै यसबारे छलफल गर्न ओलीले आइतबार नै नेपाली कांग्रेस सभापति शेरबहादुर देउवालाई फोन गरेर सोधेका थिए । सभापति देउवाले भने पूर्वसभामुख ढुंगाना राजकीय सम्मान गर्न लायक व्यक्तित्व भएको भन्दै सरकारलाई आफ्नो निर्णय गर्न सुझाव दिएका थिए । तर सरकार बैठक भने ढिला बस्दा सबैले अनहकमा दुःख पाएका छन् ।

आइतबार दिउँसो २ बजे नै ढुंगानाको निधन भएको थियो । तर सरकारकै आलटालले सोमबार बिहानमात्रै र त्यो पनि बिहान ९ बजेमात्र बैठक बसेर सो निर्णय गर्दा यस्तो अन्योल उत्पन्न भएको हो ।