काठमाडौं । संस्कृति, पर्यटन तथा नागरिक उड्डयनमन्त्री बद्रीप्रसाद पाण्डेले विविधतापूर्ण संस्कृति र प्रकृति नेपालको पहिचान भएको बताएका छन् ।

भीष्म बाँस्तोलाद्वारा लिखित नेपाल मण्डल पुस्तकको शुक्रवार ललतिपुरमा विमोचन गर्दै पर्यटनमन्त्री पाण्डेले यस्तो बताएका हुन् । उनले विविधतापूर्ण संस्कृति र प्रकृति मुलुकको पहिचान भएको भन्दै त्यसलाई सरकारले विश्व माझ पुर्याउन सक्नु पर्ने बताए ।

उनले विश्वमा मुलुकको विविधतापूर्ण संस्कृति र प्रकृतिलाई चिनाउनसक्दा मात्रै विश्वमा पर्यटकहरु नेपालमा आउने वातावरण बन्ने बताए । उनले विश्वका मानिसहरु नेपालको संस्कृति र प्रकृति हेर्नको लागि एक पटक आउनुपर्ने बनाउन सबै लाग्नुपर्ने आवश्यकता रहेको बताए । उनले प्राकृतिक दृष्टिकोणले पनि विशिष्ट उपहार पाएको मुलुक भएको बताए ।

उनले नेपालमा ६० मिटर होचो केचनकवलदेखि ८ हजार ८४८ मिटर उचाईमा भएको सगरमाथा रहेको बताए । उनले हिमाल, पहाड,तराई र जल, जंगल, जडिबुटी लगायत विविध प्राकृतिक उपहारले सम्पन्न मुलुकलाई विश्वमा प्रचार गरी पर्यटन विकास गर्न सक्नुपर्नेमा जोड दिए ।

उनले विश्वका मानिसहरु खुला संग्राहलयभित्र आइरहनुपर्ने वातावरण बनाउनसके नेपालको पर्यटन क्षेत्र विकास हुँदै मुलुकको जीडिपीमा ठूलो योगदान पुग्ने बताए । उनले त्यसबाट मुलुकभित्रै रोजगारी सिर्जना गर्न सकिने बताए ।