एजेन्सी । आउँदो अंग्रेजी नयाँ वर्षदेखि भारतमा गाडीको मूल्य बढ्ने भएको छ । भारतका गाडी उत्पादक कम्पनीहरु मारुती सुजुकी इन्डिया, महिन्द्रा एण्ड महिन्द्रा, हुन्डाई र एमजी मोटर कम्पनीहरुले आउँदो नयाँ वर्ष २०२५ देखि गाडीको मूल्य बढाउने घोषणा गरेका छन् ।

बढ्दो कच्चा वस्तु लागत र सञ्चालन खर्चको असरलाई कम गर्न सुजुकी र महिन्द्रा, एमजी र हुन्डाईले आउँदो जनवरीदेखि गाडीको मूल्य बढाउने योजना घोषणा गरेका हुन् ।

भारतको सबैभन्दा ठूलो कार निर्माता मारुती सुजुकीले जनवरीदेखि आफ्नो मोडलअनुसार ४ प्रतिशतसम्म बढाउने भएको छ । यस्तै महिन्द्रा एण्ड महिन्द्राले आफ्ना एसयूभी मोडल र कमर्शियल गाडीको मूल्य ३ प्रतिशतसम्म बढाउने जानकारी दिएको छ ।

मारुती सुजुकी इन्डियाले नियामक फाइलिङमा कच्चा वस्तुको लागत र परिचालन खर्च बढेका कारण जनवरी २०२५ देखि आफ्ना कारहरूको मूल्य बढाउने योजना बनाएको जानकारी दिएको छ ।

कम्पनीका अनुसार गाडीको मूल्य ४ प्रतिशतसम्म बढ्ने अनुमान गरिएको छ । यद्यपि, गाडीको मोडेल अनुसार मूल्य फरक पर्नेछ ।
‘कम्पनीले लागतलाई अनुकूलन र आफ्ना ग्राहकहरूमा पर्ने प्रभावलाई न्यूनीकरण गर्न निरन्तर प्रयास गरिरहँदा बढेको लागतको केही अंश बजारमा हस्तान्तरण गर्नुपर्ने हुन सक्छ’ मारुती सुजुकीले भनेको छ ।

मारुती सुजुकीले घरेलु बजारमा अल्टो ह्याचब्याकदेखि इन्भिक्टो मल्टि युटिलिटी गाडी ब्राण्डका गाडीसम्मका विभिन्न मोडलहरू बिक्री गर्छ ।
महिन्द्रा एण्ड महिन्द्राले आगामी जनवरीदेखि आफ्ना एसयूभी र व्यावसायिक सवारी साधनको मूल्य ३ प्रतिशतसम्म बढाउने बताएको छ ।

‘मूल्य समायोजन मुद्रास्फीति र बढेको वस्तुको मूल्यका कारण गाडीको भाउ बढाउन लागिएको हो’ महिन्द्राले जारी गरेको विज्ञप्तिमा उल्लेख छ ।

विभिन्न एसयूभी र कमर्शियल गाडीको मूल्य वृद्धि ३ प्रतिशतसम्म हुने अटो मेजरले जनाएको छ ।

त्यस्तै, जेएसडब्लु एमजी मोटर इन्डियाले पनि अर्को महिनादेखि आफ्नो सम्पूर्ण मोडल मूल्य ३ प्रतिशतसम्म बढाउने बताएको छ ।

‘मूल्य वृद्धि लगातार बढ्दो कच्चा वस्तु लागत र अन्य बाह्य कारकहरूको परिणाम हो’ अटोमेकरले एक विज्ञप्तिमा भन्यो ।

‘अटोमेकरले यी अतिरिक्त लागतहरूको सकेसम्म धेरै समाहित गर्ने प्रयास गरेको छ, तर यो वृद्धिको एक अंश ग्राहकहरूलाई हस्तान्तरण गर्न आवश्यक छ,’ एमजीले भनेको छ ।
‘गुणस्तर, नवीनता र दिगोपनप्रतिको हाम्रो समर्पण प्राथमिकतामा रहन्छ र यसले हामीलाई हाम्रा प्रस्तावहरूलाई निरन्तर सुधार गर्न प्रेरित गर्छ । यसो गर्दा बढ्दो कच्चा वस्तुको लागतलाई सन्तुलनमा ल्याउन मूल्य समायोजन अपरिहार्य छ’ जेएसडब्लु एमजी मोटर इन्डियाका प्रमुख वाणिज्य अधिकारी सतिंदर सिंह बाजवाले भने ।

‘कम्पनीले ग्राहकहरूमा पर्ने प्रभावलाई न्यूनीकरण गर्ने प्रयास गर्दा पनि मूल्य वृद्धिले मुद्रास्फीतिका चुनौतीहरूबाट जोगाउँछ’ उनले थपे ।

डिसेम्बरमा, हुन्डाई मोटर इन्डियाले जनवरी १ देखि मोडेलअनुसार आफ्ना गाडीहरूको मूल्य २५ हजार भारुसम्म बढाउने घोषणा गरेको छ ।

विभिन्न लक्जरी अटो निर्माता मर्सिडिज बेन्ज, बिएमडब्लु र आउडीले पनि अर्को महिनादेखि गाडीको मूल्य बढाउने घोषणा गरेका छन् ।

लक्जरी गाडी उत्पादकहरुले पनि उत्पादन लागतमा भएको वृद्धि, प्रतिकूल विनिमय दर र कच्चा वस्तुमा भएको वृद्धिका कारण मूल्यवृद्धि आवश्यक भएको विज्ञप्तिमा उल्लेख गरेका छन् ।

मारुती सुजुकी, महिन्द्रा, हुन्डाई र एमजी गाडीको नेपालमा राम्रो बिक्री रहेको छ । भारतमा ४ प्रतिशतसम्म भाउ बढ्दा यसको असर नेपाली बजारमा पर्ने भएको छ ।

(द इकोनोमिक टाइम्सको सहयोगमा)