पुस १८ काठमाडाैं, प्रचण्ड–माधव नेपाल पक्षले एक महिनाका लागि दोस्रो चरणको आन्दोलन कार्यक्रम घोषणा गरेको छ । शनिवार केन्द्रीय कार्यालय पेरिसडाडामा बसेको आन्दोलन परिचालन समितिको बैठकले पार्टी संगठन पुनर्गठन र संघर्षका कार्यक्रम एकसाथ अघि बढाउने निर्णय गरेको हो ।

बैठकका निर्णय सार्वजनिक गर्न आयोजित पत्रकार सम्मेलनमा संयोजक नारायणकाजी श्रेष्ठले दोस्रो चरणको आन्दोलनका कार्यक्रमबारे जानकारी दिएका हुन् । जसमा देशभर विरोध प्रदर्शन, भेला, मसाल जुलुस,सभा र विभिन्न राजनीतिक दलहरुसँग अन्तरक्रिया कार्यक्रम गर्ने लगायतका कार्यक्रम छन् ।

के के छन् आन्दोलनका कार्यक्रम :

पुस २० गतेसम्म पालिका स्तरमा र २५ सम्म वडा स्तरमा पार्टी भेला र संघर्षसम्बन्धी अभिमुखीकरण कार्यक्रम ।

पुस २५ गते सम्म प्रदेश, जिल्ला, पालिका र वडा स्तरमा संघर्ष समिति गठन ।

पुस २१ गते संघीय राजधानी र विभिन्न शहरी केन्द्रहरुमा राजनीतिक पार्टीहरुसँग अन्तरक्रिया ।

पुस २ नागरिक समाजसँग अन्तरक्रिया ।

पुस २४ गते सबै जिल्ला प्रशासन कार्यालयमार्फत प्रधानमन्त्रीलाई विरोध पत्र र संविधानको पुस्तक दिने र राष्ट्रका नाममा क्षमायाचना गरी गलत कदम सच्याउन अनुरोध गर्ने ।

पुस २६ गते सडक संविधान वाचन व्याख्या कार्यक्रम ।

पुस २७ गते सुदूरपश्चिम, लुम्बिनी र प्रदेश १, २८ गते प्रदेश २, गण्डकी र कर्णाली तथा २९ गते बाग्मतीमा बृहत कार्यकर्ता भेला ।

पुस २८ गते घरघरमा पर्चा वितरण, गाउँटोलमा कालो झण्डा गाड्ने र असंवैधानिक एवं प्रतिगामी कदमविरुद्ध सबै वडामा व्यानर राख्ने ।

पुस २९ गते निर्वाचन क्षेत्रस्तरयि कार्यकर्ता भेला ।

पुस ३० गते सबै वडामा विरोध प्रदर्शन र सभा ।

माघ ५ गते सबै पालिकाहरुमा विरोध प्रदर्शन र सभा ।

माघ १० गते राजधानी लगायतका सबै शहरी केन्द्रहरुमा मोटरसाइकल र्‍याली ।

माघ १६ गते प्रदेश १, गण्डकी, लुम्बिनी, कर्णाली र सुदूरपश्चिममा र १७ गते प्रदेश २ मा विरोध सभा ।

माघ २२ गते वडा तहमा मसाल जुलुस ।

माघ २३ गते राजधानीमा विरोध प्रदर्शन ।