काठमाडौं । नेपालले भूटानका दुई फरक उमेरसमूहका महिला टोलीसँगको मैत्रीपूर्ण फुटबलमा खराब प्रदर्शन गरेको छ ।

घरेलु मैदानमा सम्पन्न भूटानको यु–१६ र यु–१९ महिला टोलीसँग नेपालले समान एक मैत्रीपूर्ण खेल खेले पनि जित निकाल्न भने सकेन ।

एक समय भूटानमाथि गोल वर्षा नै गर्ने नेपालको प्रदर्शन बिर्सनलायक नै रह्यो । त्रिपुरेश्वरस्थित दशरथ रंगशालामा आईतवार नेपाली यु–१९ महिला टोली भूटानसँग १–१ को बराबरीमा खुम्चियो । नेपालले बराबरीको नतिजा सामना गरे पनि भुटानी टोलीले सुन्दर फुटबल खेलेको थियो । सटिक र सुन्दर पाससँगै फिटनेसमा पनि भूटानी टोली अब्बल रह्यो ।

यसैको मद्दतमा भूटानले पुनरागमन गर्दै बराबरीको नतिजा ल्याएको हो ।

यससँगै नेपालले भूटानसँगको दुई मैत्रीपूर्ण खेलमा एक पनि निकाल्न सकेन । गत शुक्रवार नेपालको यु–१६ महिला टोलीले ५–१ को लज्जास्पद हार व्यहोरेको थियो । यु–१९ नेपाली टोलीले जित निकाल्ने अपेक्षा गरे पनि हुन सकेन ।

आईतवार शुरुवाती अग्रता जोगाउन नसक्दा नेपाली यु–१९ टोली भूटानसँग रोकिएको हो । पाहुना टोलीले नेपालमाथि राम्रो फुटबल प्रदर्शन गरेको थियो । एकेडेमीका खेलाडी र लामो समयदेखि तयारी गरेको भूटानी टोलीको प्रदर्शनबाट स्पष्ट देखिन्थ्यो । नेपाली टोलीको प्रदर्शन भने सुखद् रहेन । नेपाली खेलाडी शारीरिक रूपमा फिट देखिएन ।

यद्यपि पहिलो हाफ गोलरहित बराबरी नै भयो । तर दोस्रो हाफ सुरू भएको दोस्रो मिनेटमै नेपालले अग्रता लियो । सुशीला केसीको गोलमार्फत नेपालले शुरूवाती अग्रता लिएको हो । भुटानका डिफेन्डरको खराब क्लियरेन्सको फाइदा उठाउँदै सुशीलाले डिबक्स बाहिरबाट वान टचमा टप कर्नरमा गोल गरेकी हुन् ।

तर उक्त अग्रता नेपालले अन्तिमसम्म कायम राख्न सकेन । निर्धारण समय सकिन ९ मिनेट बाँकी रहँदा फुन्टोस छोडेनले गोल गर्दै भुटानलाई खेलमा फर्काइन् ।

उनले प्रिया घलेको क्रसमा उनले गोल गरेकी थिइन् । त्यसपछि नेपाली टोलीले गोल फर्काउन सकेन र १–१ को बराबरीमा नै खेल टुंगियो । भुटानकी प्रशिक्षक टंकमाया घलेले लामो तयारी गरेअनुरूप नतिजा प्राप्त भएको उल्लेख गर्दै छिटै महिला साफ जित्ने विश्वास व्यक्त गरिन् ।