टोकियो, एएफपी । जापानी दिग्गज अटो कम्पनी होन्डा मोटर्स लिमिटेड र यसको संघर्षरत प्रतिद्वन्द्वी निसान मोटर्स लिमिटेडले सोमबार चिनियाँ प्रतिद्वन्द्वी र टेस्लाको विद्युतीय सवारी साधनसँग प्रतिस्पर्धा गर्न विलय (मर्ज) का लागि वार्ता सुरु गर्न सहमति जनाएका छन् ।

उनीहरूको सहकार्यले विश्वको तेस्रो ठूलो अटोमेकर बन्नेछ । जसले विद्युतीय सवारी र स्व–चालक प्रविधिको विकासलाई विस्तार गर्ने बताइएको छ।

तर होन्डाका प्रमुख कार्यकारी अधिकृत (सिइओ) ले निसानका लागि यो बेलआउट नभएको बताएका छन् । उनले गत महिना हजारौँ रोजगारी कटौती र पहिलो अर्धवार्षिक खुद नाफा ९३ प्रतिशत गिरावट आएको घोषणा गरेका थिए ।

“यो उद्धार होइन”, विलयको एक सर्त निसानले आफ्नो तथाकथित ‘टर्नअराउन्ड’ योजना पूरा गर्नुपर्ने कुरामा जोड दिँदै तोशिहिरो मिबेले पत्रकारहरूलाई भनेका छन् । कमजोर उपभोक्ता खर्च र विभिन्न बजारमा कडा प्रतिस्पर्धाले धेरै वाहन निर्माताहरूका लागि जीवन कठिन बनाइरहेको छ ।

चीनमा विदेशी ब्रान्डहरूका लागि व्यवसाय विशेष गरी कठिन भएको छ । त्यहाँ कम प्रदूषणकारी सवारी साधनहरूको माग बढ्दै जाँदा बिवाइडी जस्ता विद्युतीय सवारी निर्माताहरूले अगुवाइ गरिरहेका छन् । मित्सुबिसी मोटर्ससँगै यी दुई कम्पनीले नयाँ होल्डिङ कम्पनीअन्तर्गत आफ्नो व्यवसायलाई एकीकृत गर्ने विषयमा छलफल सुरु गर्न समझदारी पत्रमा हस्ताक्षर गरेको बताएका छन् ।

‘दुवै कम्पनी र अटोमोटिभ उद्योग वरपरको वातावरणमा नाटकीय परिवर्तनहरू’ लाई उद्धृत गर्दै कम्पनीहरूले सन् २०२६ अगस्टमा टोकियो स्टक एक्सचेन्जमा होल्डिङ कम्पनीलाई सूचीबद्ध गर्ने योजना बनाएको संयुक्त विज्ञप्तिमा उल्लेख छ ।

ताइवानको इलेक्ट्रोनिक्स बेहेमोथ फक्सकनले बहुमत सेयर प्राप्त गर्न निसानसँग असफल सम्पर्क गरेको रिपोर्टपछि यो समाचार आएको हो । त्यसपछि यसले रेनल्टलाई निसानमा आफ्नो ३५ प्रतिशत हिस्सेदारी बेच्न आग्रह गरेको थियो । यसलाई अहिले रोकिने बताइएको छ ।

सरकारी विद्युतीय सवारी समर्थनको मद्दतले चीनले गत वर्ष जापानलाई सबैभन्दा ठूलो सवारी साधन निर्यातकका रूपमा उछिन्यो । टोयोटापछि जापानको नम्बर दुई र तीन अटो निर्माताहरू होन्डा र निसान मार्चमा पहिले नै अन्य प्रविधिहरू बीच विद्युतीय सवारीहरूका लागि सफ्टवेयर र कम्पोनेन्टहरूमा रणनीतिक साझेदारी अन्वेषण गर्न सहमत भएका छन् । यो साझेदारी अगस्टमा मित्सुबिसी मोटर्सले गरेको थियो ।

कम्पनीहरूले आगामी वर्ष जुनमा आफ्नो विलय सम्झौता टुङ्ग्याउन चाहन्छन्, तर यो बराबरीको विवाह हुने सम्भावना छैन । होन्डाले नयाँ होल्डिङ कम्पनीको अध्यक्ष मनोनीत गर्नेछ । यसको बोर्ड प्रायः होन्डाका कार्यकारीहरू मिलेर बनेको हुनेछ ।

निसान मित्सुबिसी मोटर्सको बहुमत सयरधनी हो । विज्ञप्तिअनुसार यसले निसान र होन्डाबीचको व्यवसाय एकीकरणमा सहभागिता वा संलग्नताको निष्कर्षमा सन् २०२५ जनवरीको अन्त्यसम्म पुग्ने लक्ष्य राखेको छ ।
होन्डा र निसानको साझेदारीमा एक अर्काको प्लान्टमा सवारी साधन निर्माण गर्ने विनिर्माण टाई–अप समावेश हुनसक्ने स्थानीय मिडियाले बताएका छन् ।