काठमाडौं । नबिल बैंकले जाजरकोट र रुकुम पश्चिममा भूकम्पपछि निर्मित ९६ अस्थायी आवास हस्तान्तरण गरेको छ । आइतबार एक विशेष कार्यक्रमबीच नबिल बैंकका अध्यक्ष उपेन्द्रप्रसाद पौडेलले नलगाड नगरपालिकाका मेयर डम्बरबहादुर रावत र चौरजहारी नगरपालिकाका मेयर पुष्प वादीलाई आवास हस्तान्तरण गरेका हुन् ।

कार्यक्रममा बैंकका प्रमुख कार्यकारी अधिकृत ज्ञानेन्द्रप्रसाद ढुंगाना, बैंकका सञ्चालक निर्वाण चौधरीलगायत उच्च पदाधिकारीको उपस्थिति थियो ।

कार्यक्रममा नबिल बैंकका अध्यक्ष पौडेलले बैंक समाजमा सकारात्मक प्रभाव पार्न सधैँ प्रतिबद्ध रहेको बताए । उनले प्राकृतिक प्रकोपबाट प्रभावितलाई सहयोग पुर्‍याउने उद्देश्यले नबिल बैंकले सामाजिक उत्तरदायित्वअन्तर्गत यो परियोजना अघि बढाएको जानकारी दिए ।

नबिलले आफ्नो संस्थागत सामाजिक उत्तरदायित्वअन्तर्गत अस्थायी आवास निर्माण गरेको हो । बैंकले स्थानीय सरकारसँगको साझेदारीमा जाजरकोटको नलगाड–१ मा ४७ र रुकुम पश्चिमको चौरजहारी–१ मा ४९ अस्थायी आवास निर्माण गरेको थियो । बैंकले अस्थायी आवास बनाउन आवश्यक जस्तापाता, बाँस, सिमेन्ट, रङरोगन, किलाकाँटीजस्ता निर्माण सामग्री उपलब्ध गराएको थियो ।

०८० साल कात्तिक १७ गते जाजरकोटको बारेकोट गाउँपालिका–१, रामीडाँडा केन्द्रविन्दु भएर गएको ६।४ म्याग्निच्युडको भूकम्पले जाजरकोट र रुकुम पश्चिममा ठूलो क्षति भएको थियो । नबिल बैंकले प्रभावित क्षेत्रका नागरिकको सहयोगका निम्ति एक करोड रुपैयाँबराबरको सहयोगको घोषणा गरेको थियो । सोहीअनुरूप बैंकले तत्काल राहत सामग्री वितरणका साथै अस्थायी आवास निर्माण गरिदिने प्रतिबद्धता जनाएको थियो ।

नबिल बैंकले आफ्नो सामाजिक उत्तरदायित्वअन्तर्गत विभिन्न समयमा विपद् प्रभावितलाई राहत उपलब्ध गराउँदै आएको छ । बैंकले भविष्यमा पनि समाजमा सकारात्मक परिवर्तन ल्याउने कार्यक्रम सञ्चालन गर्दै जाने प्रतिबद्धता जनाएको छ ।