काठमाडौं । जलविद्युतमा भारतीय लगानी बढिरहेका बेला चर्चित सोलार कम्पनी प्रजोल ग्रिन इनर्जीको नेपालमा प्रवेश भएको छ । व्यवसायिक समूह गोल्यान ग्रुपको साझेदारीमा प्रजोल ग्रिन इनर्जी नेपालमा प्रवेश गरेको हो । गोल्यान ग्रुपले प्रजोलसँग साझेदारीमा नेपालमा सोलार प्लान्टबाट ५ सय मेगावाट बिजुली उत्पादन गर्ने भएको छ ।

गोल्यान ग्रुपले भारतको अहमदाबादस्थित प्रोजेल ग्रीनसँग गत भदौको अन्तिम साता काठमाडौंमा संयुक्त लगानीमा सोलार प्रविधिबाट ५ सय मेगावाट बिजुली उत्पादनको सम्झौता गरेको थियो । सम्झौतामा प्रोजेल ग्रीनका निर्देशक शोभित राई र गोल्यान पावरका निर्देशक अक्षय गोल्यानले हस्ताक्षर गरेका थिए । संयुक्त लगानीमा सौर्य परियोजना बनाउन दुबै कम्पनीले संयुक्त उद्यम (जेभी) सम्झौतामा हस्ताक्षरका साथै कम्पनी स्थापना भइसकेको छ ।

संयुक्त उद्यम प्रोजेल ग्रीन इनर्जीले नेपालका विभिन्न स्थानमा आउँदो दुई वर्षमा ५ सय मेगावाटभन्दा बढी सौर्य ऊर्जा परियोजनाहरुबाट बिजुली उत्पादन गर्ने लक्ष्य राखेको छ । जेभी परियोजनामा प्रोजेल ग्रीन इनर्जीको ६० प्रतिशत र बाँकी ४० प्रतिशत गोल्यान ग्रुपको स्वामित्व हुने भएको छ ।

प्रजोल इनर्जीले सोलार प्रविधिबाट भारतमा २ हजार मेगावाट विद्युतीय ऊर्जा उत्पादन गरिसकेको छ । प्रजोल भारतको ठूलो इपिसी ऊर्जा कम्पनी हो । प्रजोलले रिलायन्स स्पिनिङ मिल्स लिमिटेडमा ९ मेगावाटको रुफटप सोलार जडान गरिसकेको छ ।

उत्पादन तथा प्रशोधन, वित्तीय सेवा, हस्पिटालिटी तथा निर्माण र जलविद्युतलगायत नविकरणीय ऊर्जामा गोल्यान ग्रुपले लगानी विस्तार गरिरहेको छ ।

यसअघि ग्रुपले भारतकै रिनेगो डेभलपर्सको साझेदारीमा नेपालगञ्जमा २० मेगावाटको सोलार प्लान्ट स्थापना गरी बिजुली उत्पादन गरिरहेको छ ।

संयुक्त उद्यमले सौर्य रूफटप र ग्राउन्ड माउन्टेड फोटोभोल्टिक (पीभी) सौर्य प्लान्टहरू विकास गर्ने भएको छ ।

यी आयोजनाबाट उत्पादित ऊर्जा नेपाल विद्युत प्राधिकरण र विभिन्न व्यावसायिक तथा औद्योगिक उपभोक्तालाई बिक्री गरिने भएको छ । विद्युत प्राधिकरणले सोलारको विद्युत खरिद बिक्री सम्झौता (पिपिए) को आधार दर प्रति युनिट ५.९४ रुपैयाँ तोकेको छ । पिपिए गर्ने कम्पनीले यो भन्दा कम दर प्रस्ताव गर्नुपर्ने हुन्छ ।

सम्झौताअनुसार प्रोजेल ग्रीन इनर्जीले नवीकरणीय ऊर्जा क्षेत्रमा आफ्नो व्यापक विशेषज्ञता प्रयोग गर्दै इन्जिनियरिङ, प्रोक्योरमेन्ट र कन्स्ट्रक्सन (इपिसी) मोडलमा विकास कम्पनीको नेतृत्व गर्ने भएको छ ।

गोल्यान ग्रुपले बाँके रैनापुरमा २० मेगावाट क्षमतायुक्त सोलार प्रविधिबाट ऊर्जा उत्पादन गरिरहेको छ । १०/१० मेगावाट गरी दुई चरणमा निर्माण भएको सोलार परियोजनामा ग्रुपले २ अर्ब २४ करोड ८६ लाख रुपैयाँ लगानी गरेको जनाएको छ ।

सोलारबाट बिजुली उत्पादन गर्न प्रति मेगावाट लागत ११ करोड २४ लाख ३० हजार रुपैयाँ परेको छ । प्योर इनर्जी लिमिटेडमार्फत परियोजना निर्माण भएको हो । सोलार परियोजनामा ६७ प्रतिशत ऋण र बाँकी ३३ प्रतिशत संस्थापकहरूको स्वपुँजी लगानी रहने छ ।

गोल्यान ग्रुपको रिलायन्स स्पिनिङ मिल्स, ह्यात सेन्ट्रिक होटल, जनता एग्रो फरेष्ट्री, माटो ब्रान्डको पानी र खाद्यन्न, एनएमबी बैंक, एनआइसी एसिया बैंक, नेपाल लाइफ इन्स्योरेन्स कम्पनी र एसियन लाइफ इन्स्योरेन्स कम्पनीमा लगानी रहेको छ ।

पछिल्लो समयमा ऊर्जामा आक्रमक रुपमा लगानी विस्तार गरेको ग्रुपले अहिले ३ सय ६ मेगावाटको अपर मुगु कर्णाली, ४६ मेगावाटको अपर बलेफी, १ सय ३५ नमलान खोला र ५४ मेगावाटको लोअर अप्सुवा खोला आयोजना बनाउने तयारी गरेको छ । लुम्बिनीमा ४ अर्ब रुपैयाँ लगानीमा पाँचतारे होटल वेद बनाउँदै छ ।

यस्तै गोल्यानको शिवम प्लास्टिक इन्डष्ट्रिज, ट्राइकोट इन्डष्ट्रिजका साथै वेस्टार प्रोपर्टीज अपार्टमेन्ट निर्माण गरिसकेको छ ।

यो पनि : 

गोल्यान ग्रुपले भारतको प्रोजेल इनर्जीको साझेदारीमा सोलारबाट ५०० मेगावाट बिजुली उत्पादन गर्ने