काठमाडौं । रेमिट हाइड्रो लिमिटेडले बनाउन लागेको ७७.५ मेगावाट क्षमताको घुन्सा खोला जलविद्युत आयोजनालाई लगानी जुटेको छ । लक्ष्मी सनराइज बैंकको अगुवाइमा १२ अर्ब ७० करोड रुपैयाँ ऋण लगानी हुने भएको छ ।

घुन्सा खोला आयोजना बनाउन निर्माण अवधिको ब्याजसहित १८ अर्ब १३ करोड रुपैयाँ लाग्ने रेमिट हाइड्रोका प्रमुख कार्यकारी अधिकृत (सिइओ) नगेन्द्रनाथ ज्ञवालीले बताए । सिइओ ज्ञवालीका अनुसार ५ अर्ब ४४ करोड स्वपुँजी (इक्विटी) लगानी हुनेछ ।

लक्ष्मी सनराज र रेमिट हाइड्रोबीच आइतबार ऋण लगानी सम्झौता हुँदैछ । अनुमान गरिएकै लागतमा आयोजना बने पनि प्रतिमेगावाट लगानी २३ करोड ४० लाख रुपैयाँ हुने देखिएको छ ।

जनताको जलविद्युतअन्र्तगत निर्माण हुन लागेको आयोजनामा सरकार स्वामित्वको नेपाल विद्युत प्राधिकरणको २१ प्रतिशत, हाइड्रो इलेक्ट्रिसिटी इन्भेस्टमेन्ट एन्ड डेभलपमेन्ट कम्पनी लिमिटेड (एचआइडिसिएल) १५ र विद्युत उत्पादन कम्पनी लिमिटेडको १५ प्रतिशत गरि कूल ५१ प्रतिशत स्वामित्व रहेको छ । आयोजना एचआइडिसिएलले अघि बढाएको हो ।

पछि एचाआइडिसिएलले विद्युत प्राधिकरण र विद्युत उत्पादन कम्पनीलाई साझेदार बनाएको छ । आयोजना बनाउन विद्युत विकास विभागले रेमिटलाई २०७९ साउन १८ गते विद्युत उत्पादन अनुमतिपत्र (लाइसेन्स) दिएको थियो । रेमिट हाइड्रो २०७१ मंसिर २८ गते स्थापना भएको हो ।

आयोजना ताप्लेजुङ जिल्लाको घुन्सा खोलामा रहेको छ । आयोजनाको ग्रस हेड ४ सय ३२ मिटर रहेको छ । मुख्य सुरुङको लम्बाइ ४.२० किलोमिटर रहेको रेमिटले जनाएको छ । आयोजना सन् २०१४ मा पत्ता लागेको हो ।

आयोजनाको बाँध स्थल, इन्टेक, थियाउने पोखरी र पहुँच सडक फक्ताङलुङ गाउँपालिकाको वडा नम्बर ५ र ६ मा रहने गरी डिजाइन तयार पारिएको कम्पनीले जनाएको छ। कम्पनीका अनुसार बाँध क्षेत्रबाट करिब ४ हजार ३ सय मिटर हेडरेस सुरुङमार्फत पानीलाई फक्ताङलुङ गाउँपालिकाकै वडा नम्बर ६ मा निर्माण हुने भुमिगत विद्युतगृहमा खसालिने छ।

विद्युतगृहमा ३ वटा टर्वाइन जडान हुनेछन् । टर्वाइनमा जडान भएको ३ वटा जेनेरेटर गुमाएर विद्युत उत्पादन हुने गरी प्रस्ताव गरिएको कम्पनीले जनाएको छ। हेडरेस सुरुङ, सर्ज ट्याङक, पेनस्टक पाइप र टेलरेस सुरुङ पनि त्यही गाउँपालिकाको वडा नम्बर ६ मा रहनेछ।

आयोजना पूरा भएपछि वार्षिक सरदर ४५ करोड ८५ लाख ८ हजार युनिट विद्युत उत्पादन हुनेछ। आयोजनाबाट उत्पादन भएको विद्युत नेपाल विद्युत प्राधिकरणको ढुंगेसाँघु सबस्टेसनमा जोडिनेछ ।

यसअघि एनएमबी बैंक र रेमिट हाइड्रोबीच जलविद्युत आयोजनामा लगानी गर्ने सम्बन्धमा सहकार्य भएको थियो । तर, कम्पनीले एनएमबीबाट नभइ अहिले लक्ष्मी सनराइज बैंकबाट ऋण लिन लागेको छ ।

घुन्सा खोला जलविद्युत आयोजनाको सेयर लगानीमा कम्पनीको प्रतिबद्धता अनुरुप वैदेशिक रोजगारीमा संलग्न व्यक्तिहरूलाई सहभागी गराउने समझदारी भएको थियो । निर्माणको चरणमा जान लागेका यी दुई आयोजनाको कुल सेयर पुँजीको २९ प्रतिशत वैदेशिक रोजगारीमा रहेकाहरूको लागि छुट्याउने समझदारीमा उल्लेख छ ।