काठमाडौं । युरोकप २०२० फुटबल प्रतियोगिताको सेमिफाइनलमा मंगलबार राति स्पेन र इटालीबीच प्रतिस्पर्धा हुँदैछ । इटाली-स्पेनबीचको खेल नेपाली समयअनुसार राति १२ः४५ बजेदेखि सुरु हुनेछ ।

यसअघि गएकाे शुक्रबार राति भएको पहिलो क्वार्टरफाइनलमा स्वीट्जरल्यान्डमाथि पेनाल्टी सुट आउटमा ३-१ गोलको नतिजामा पराजित गरी स्पेनले सेमिफाइनलमा स्थान सुरक्षित गरेको थियो । त्यही रात भएको अर्को क्वार्टरफाइनलमा बेल्जियममाथि २-१ गोलको जित निकालेर इटालीले पनि फाइनल प्रवेशका लागि स्पेनसँग भेट निश्चित गरेको हो ।

युरो २०१६ मा स्पेन र इटालीले अन्तिम १६ मा एकअर्काको सामना गरेका थिए । सो खेलमा इटालीले स्पेनलाई २-० गोल अन्तरले हराएको थियो । त्यसअघि २०१२ को फाइनलमा स्पेनले इटालीलाई हराएर उपाधि हात पारेको थियो । सन् २००८ को युरो कपमा इटाली र स्पेनबीच क्वार्टरफाइनलमा प्रतिस्पर्धा गरी स्पेन विजयी भएको थियो ।

पछिल्लो समय युरोपको सबैभन्दा उत्कृष्ट फर्ममा भएको इटालीले कीर्तिमानी ३२ खेलमा अपराजित यात्रा तय गरिसकेको छ । अर्कातिर पछिल्ला १२ खेलमा अपराजित स्पेनले समूह चरणको दुई खेल बराबरी खेलेको थियो ।