निवर्तमान प्रधानमन्त्री एवं नेकपा एमालेका अध्यक्ष केपी शर्मा ओलीले भाेलिदेखि नयाँ सरकारले खाेप ल्यायाे भनी चर्चा सुरु हुने बताएका छन् । मंगलबार देशबासीका नाममा सम्बाेधनका क्रममा उनले देश कोभिड विरुद्धकाे खाेप आइरहेकाे र अब खाेप अभाव नहुने दाबी गरे । 

‘ल्याइदिएकाे खाेप लगाएर फाेटाे खिचेर  नयाँ सरकारले खाेप ल्यायाे भनी चर्चा सुरु हुनेछ । मानाैँ उनीहरुले जादु गरेर आजै खाेप ल्याए । मलाई प्रचारकाे प्रतिस्पर्धा गर्नु छैन । देश र जनताकाे लागि काम गर्ने हाे ।’ सम्बाेधनका क्रममा ओलीले भने । 

अमेरिका, जापान, चीनलगायतका मुलुकबाट अब धमाधम खाेप आउने र अब अभाव नहुने उनकाे भनाइ थियाे ।

ओलीले जनादेश आफ्नो पक्षमा हुँदाहुँदै पनि परमादेश नेपाली कांग्रेसका सभापति शेरबहादुर देउवाको पक्षमा आएकाले सरकारबाट बाहिरिनुपरेको बताए । ओलीले भने, ‘जनताको जनादेशले होइन, सर्वाेच्चको परमादेशले बाहिरिनुपर्‍यो । जनादेश मेरो पक्षमा थियो, परमादेश देउवाजीको पक्षमा भयो ।’

सरकारबाट बाहिरिनुपर्दा रत्तिभर चिन्ता नरहेको ओलीले बताए । ‘मलाई रत्तिभर चिन्ता छैन । मैले देश र जनताप्रति इमान्दारिताका साथ समृद्धि, सुशासन, विकासलाई ध्यान राखेर काम गरेको छु,’ उनले भने ।