काठमाडौं । उखु किसानको मागलाई केपी शर्मा ओली सरकारले जस्तो बेइमानी नगर्न विभिन्न ६ वटा किसान संगठनले अनुरोध गरेका छन् । किसान संगठनले चिनी उद्योगीहरुले उखु किसानको रकम तत्काल भुक्तानी गराउन माग पनि गरेका छन् । 

अखिल नेपाल किसान महासंघ (क्रान्तिकारी केन्द्र), नेपाल किसान महासंघ, अखिल नेपाल किसान महासंघ (अप्फा), अखिल नेपाल किसान महासंघ (क्रान्तिकारी), अखिल नेपाल किसान युनियन र अखिल नेपाल प्रगतिशील किसान संघले आइतबार संयुक्त विज्ञप्ति जारी गर्दै यस्तो यस्तो माग गरेका हुन् । उनीहरुले किानको रकम एकमुष्ट भुक्तानी नगरे चिनी उद्योग, व्यापारी र सरकारविरुद्ध कडा आन्दोलन गर्ने चेतावनी समेत दिएका छन् । 

६ संगठनले निकालेको विज्ञप्तीमा भनिएको छ, ‘वर्तमान सरकारले ओली सरकारले जस्तो बेइमानी नगरी उखु किसानहरुले चिनी मिलहरु र अन्य व्यापारीहरुलाई बेचेको उखुको भुक्तानी बापत प्राप्त गर्नुपर्ने रकम अविलम्ब भुक्तानी गर्न गराउन हामी किसान संगठनहरु जोडदार माग गर्दछौँ । यदि किसानहरुको रकम तत्काल भुक्तानी नगरिएमा हामी उखु किसानहरुको पक्षमा चिनी उद्योग तथा व्यापारीहरु र सरकारको विरुद्ध कडा संघर्षमा उत्रिने र संघर्षको मैदानमा कुनै अप्रिय घटना घटेमा त्यसको सम्पूर्ण जिम्मेवार सम्बन्धित चिनी उद्योगी, व्यापारी तथा सरकार हुने कुरा पनि यसै प्रेस वक्तव्यमार्फत स्पष्ट पार्न चाहन्छौं ।’