एजेन्सी । पाकिस्तानका प्रधानमन्त्री इमरानकी पूर्व श्रीम्ती रेहम खानको कारमाथि राजधानी इस्लामाबादमा गोली चलाइएको छ । हमलामा उनी बालबाल बाँचेकी छिन् । सोमबार सबेरै रेहम आफैंले सोसल मिडियामा यो घटनाबारे जानकारी दिएकी हुन् । उनले लेखेकी छिन्, ‘म आफ्नो भतिजोको विवाहबाट फर्किरहेकी थिएँ । बाइकमा सवार दुईजनाले सुरुमा मेरो गाडीमा गोलीबारी गरे । पछि बन्दुक देखाउँदै कार रोके । म निकै मुश्किलले अर्को गाडीमा चढेर घर पुगेँ । मेरो घरमा ड्राइभर र सेक्युरिटी गार्ड बाँकी भए । के यही इमरान खानको नयाँ पाकिस्तान हो  यो त कायर र ठगहरुको मुलुक हो ।’

रेहमले यो पोस्ट सोमबार बिहान १ः५९ मा गरेकी हुन् । रेहमले सोमबार बिहान ९ बजे पुनः अर्को पोस्ट गरिन् । भनिन्, ‘मेरा स्टाफ अहिलेसम्म एक मिनेट पनि सुत्न पाएका छैनन् । उनीहरु शम्स कोलोनी पुलिस स्टेशनमा बसिरहेका छन् र प्रहरीले एफआइआर दर्ता गर्न मानेका छैनन् । मलाई एफआइआरको कपीको प्रतीक्षा छ । यो मुश्किल समयमा साथ दिएकोमा फलोअर्सलाई धन्यवाद । मलाई मृत्युसँग डर लाग्दैन ।’

इमरान खानले हालसम्म तीन विवाह गरेका छन् । जेठी श्रीमतीको नाम जेमिया गोल्डस्मिथ खान, माहिली रेहम खान र कान्छी बुशरा मेनका हुन् । बुशरा अहिले पनि इमरानसँग बस्छिन् । पाकिस्तानले उनलाई पिंकी पिरनी नामले चिन्दछ ।