काठमाडौं । जनता समाजवादी पार्टी नेपाल (जसपा) ले १२ वटा एजेण्डामा छलफल सुरु गरेको छ । पार्टीको कार्यकारिणी समितिको शुक्रबारदेखि सुरु बैठकका लागि विभिन्न १२ वटा एजेण्डा पेश भएको पार्टीका कार्यालय सचिव प्रकाश अधिकारीले बताए । 

उनका अनुसार बैठकमा स्थानीय तहको निर्वाचन, एमसीसी, समसामयिक राजनीतिक अवस्था, कार्यकारीणीलाई पूर्णता, केन्द्रीय समितिको कार्यविभाजन, नेतृत्व प्रणाली, विधान अधिवेशन, सुज अभियान, सरकारमा सहभागी मन्त्रीहरुको कार्य समिति, केन्द्रीय समिति र संघीय परिषद्को बैठक लगायतको एजेण्डा तय गरेर छलफल सुरु भएको छ । 

यसअघि बैठक औपचारिक रुपमा सुरु हुनुअघि पक्ष विपक्षमा चर्काचर्की भएको थियो । ग्वार्कोको एक होटलमा बसेको बैठकमा एजेण्डा प्रस्तुत नहुँदै नेताहरुले आ–आफ्ना कुरा पक्ष र विपक्षमा राख्न थालेका थिए ।

जसपाका अध्यक्ष उपेन्द्र यादव पक्षका नेताहरुले संघीय परिषद्का अध्यक्ष डा बाबुराम भट्टराईको कमीकमजोरी देखाई आलोचना गरेका थिए भने अध्यक्ष पक्षका नेताहरुले अध्यक्ष यादवको कमीकमजोरी देखाइ आलोचना गर्न लागिपरेका थिए । यही विषयमा दुबै पक्षबीच चर्काचर्की भइरहेको एक नेताको भनाइ छ ।

तर अधिकारीले भने नेताहरुले कुरा राख्दा आवाज केही ‘लाउड्ली’ मात्रै भएको प्रतिकृया दिए । ‘एजेण्डा लगायतको विषयमा अनौपचारिक छलफल चल्दा नेताहरुले केही कुरा राख्दा बाहिर त्यस्तो सुनिएको हो तर बैठकमा कुनै चर्काचर्की भएको होइन’, उनको भनाइ छ ।

उनका अनुसार बैठकमा संघीय परिषद्का अध्यक्ष डा.बाबुराम भट्टराईले चलाएको हस्ताक्षर अभियानको बारेमा पनि छलफल हुनेछ । उनले अध्यक्षको लागि पार्टीमा देखिएको विवादको बारेमा पनि छलफल हुने बताए ।