सहज जितसँगै पोर्चुगल विश्वकप छनोट नजिक

सुनौलो नेपाल
शुक्रबार, ११ चैत्र २०७८

काठमाडौं । टर्कीविरुद्धको खेलमा सहज जित निकाल्दै पोर्चुगल फिफा विश्वकप २०२२ को लागि छनोट नजिक पुगेको छ । कतार विश्वकप छनोट अन्तर्गतको प्ले अफको सेमिफाइनलमा पोर्चुगलले टर्कीलाई ३–१ ले पराजित गर्दै प्ले अफको फाइनलमा प्रवेश गरेको हो ।

घरेलु मैदानमा पोर्चुगललाई जित दिलाउन ओटाभियो, डिएगो जोटा र म्याथिएस लुइजले एक–एक गोल गरे । उता टर्कीका बुराक यिल्माजले एक गोल फर्काए । ओटाभियोले खेलको १५औं मिनेटमा गोल गर्दै पोर्चुगललाई अग्रता दिलाए । ओटाभियोको पासमा डिएगो जोटाले ४२औं मिनेटमा गोल गर्दै पोर्चुगललाई २–० गोलको अग्रता दिलाए ।

टर्कीका लागि ६५औं मिनेटमा बुराक यिल्माजले गोल गर्दै खेललाई २–१ को स्थितिमा ल्याए । टर्की ८५औं मिनेटमा पेनाल्टीमा गोल गर्नबाट चुक्यो । बुराकले प्रहार गरेको पेनाल्टी गोल हुन सकेन । इन्जुरी समयमा म्याथिएस लुइजले गोल गर्दै जित पक्का गर्दै टोली ३–१ गोलको जितसहित विश्वकप छनोट अन्तरगतको प्ले अफको फाइनलमा पुर्‍याए । अब पोर्चुगलले प्ले अफको फाइनलमा नर्थ म्यासेडोनियासँग प्रतिस्पर्धा गर्नेछ ।