झापा । झापा आन्दोलनका एक हस्तीले नेकपा एमाले त्यागेको घोषणा गरेका छन् । मंगलबार बिहान मेचीनगरका स्थानीय पत्रकारसँग आँसु खसालेर नेकपा एमालेको साधारण सदस्यता समेत नरहने गरी पार्टी परित्याग गरेको बताए ।

मेची नगरपालिकाको मेयरका आकांक्षी बनेका नेकपा एमालेका नेता डिल्लीराम घिमिरेले पार्टीभित्रको चरम गुटबन्दीका कारण पार्टीबाट अलग भएको बताए ।

मेची नगरमा घिमिरे नेकपा एमालेबाट नगर प्रमुख पदका लागि आकांक्षी थिए । तर, हालै सम्पन्न पाटीको आन्तरिक मतदान सहितको सर्वेक्षणमा उनी पछि परेका थिए ।

गएको स्थानीय तहको निर्वाचनमा पनि घिमिरे मेयरका लागि आकांक्षी थिए। स्थानीय पार्टी कमिटीले अर्को स्थानीय तहको निर्वाचनका मेयरका लागि पक्का गरेपछि उनले त्यस बखत उक्त पदको दाबी छोडेका थिए ।

घिमिरे झापा आन्दोलनदेखि नै पार्टीमा सक्रिय थिए । उनी नेकपा एमालेका अध्यक्ष केपी शर्मा ओलीका निकट हुन् ।