काठमाडौं । गृहमन्त्री खाँणले आसन्न निर्वाचनलाई निष्पक्ष र भयरहीत बनाउन सरकारले आवश्यक सुरक्षा व्यवस्था परिचालन गरिसकेको बताएका छन् । गृहमन्त्री खाँणले स्थानीय तह निर्वाचनको अनुभवबाट सिकेर सरकारले आसन्न प्रतिनिधि सभा र प्रदेश सभा सदस्य निर्वाचनलाई भयरहीत वातावरणमा निष्पक्ष रुपमा सम्पन्न गर्न आवश्यक राज्य शक्तिको परिचालन गरिएको बताएका हुन् ।

उनले निर्वाचनका क्रममा हुनसक्ने घटनाहरुलाई मध्यनजर गरी सरकारले नेपाली सेनाको हेलिकप्टर र हवाइजहाजलाई अलर्ट गरिसकेको बताए । रुपन्देही निर्वाचन क्षेत्र नम्बर ३ का प्रतिनिधि सभा उम्मेदवारसमेत रहनुभएका खाँणले आफूमाथि लाग्दै आएको आसन्न निर्वाचनका गलत तथ्यांकहरु प्रश्तुत गरेको आरोपबारे सञ्चारमाध्यमहरुले जनमत सर्वे गरी प्रशारण गरेका तथ्यांकहरु नै प्रश्तुत गरेको बताए । न्युज एजेन्सी नेपालसँगको कुराकानीमा उनले निर्वाचनबारेका कुनैपनि पूर्वानुमानका तथ्यांकहरु सरकारले प्रश्तुत गर्न नमिल्ने र नगर्ने पनि बताए । उनले आसन्न निर्वाचनबाट नेपाली काँग्रेस देशको ठूरो राजनीतिक पार्टी बन्ने र गठबन्धनकै सरकार बन्ने दाबी गरे । नेपाली काँग्रेसका केन्द्रिय सदस्यसमेत रहनुभएका खाँणले विपक्षी दलहरुले सोचेको र देखाएको तामझामअनुसारको निर्वाचन नतिजा नआउने दाबी गरे ।

उनले भने, ‘चुनाव निष्पक्षतासँग सम्पन्न गर्नलाई नै सबै शक्ति राज्यले लगाएको छ । पुरानो अनुभवको आधारशीलालाई लिएर यो निर्वाचनलाई एकैपटक सञ्चालन गर्नसक्छौँ । कुनै घटना भए तत्काल नेपाली सेनाको हेलिकप्टहरु प्रयोग गर्न सकिन्छ । थप जनशक्ति लैजान नेपाली सेनाको जहाज, हेलि राखेका छौँ । हामीले जनमत सर्वेका तथ्यांकहरु विश्लेषण गर्दा नेपाली काँग्रेस ठूलो पार्टी बन्छ । काँग्रेस लगायतको गठबन्धनको सरकार बन्छ । विपक्षी दलहरुले जस्तो सोचिरहनुभएको त्यो नतिजा आउँदैन, उहाँहरुले सोचेको भन्दै धेरै कम मात्र नतिजा आउँछ । हामीले सबैभन्दा पहिला मतदाता, जनताको सुरक्षा गर्ने हो, निर्वाचनमा खटिएका कर्मचारीहरुको सुरक्षा र उम्मेदवारको सुरक्षा गर्नु हाम्रो दायित्व हो । उम्मेदवारको सुरक्षप्रति हामी प्रतिवद्ध छौँ । जुनसुकै दल र पार्टीका उम्मेदवार साथीहरुले सुरक्षा चाहिएको छ भने सुरक्षा उपलब्ध गराउनेछौँ । हामीले सञ्चारमाध्यमहरुले गरेको आँकलनका आधारमा भनेका हौँ । सरकारी तवरबाट तथ्यांक प्रश्तुत गर्ने भन्ने मिल्दैन, हुँदैन । विभिन्न सञ्चारमाध्यमहरुले आफ्नो आँकलन गरिरहनुभएको छ, त्यो कतिपय सही पनि छन् । किनभने सत्ता गठबन्धनको तथ्यांक स्थानीय निर्वाचनदेखि अहिलेसम्म हेर्दा मत सर्वेमा पनि सत्ता गठबन्धन अघि नै छ । यो सरकारी आँकलन बाहिर ल्याएको पनि होइन । तर कतिपय मत सर्वे स्थानीय निकाय र पार्टीले पनि निकालीरहेको हुन्छ ।’

गृहमन्त्री खाँणले उम्मेदवार, जनता, मतदाता र निर्वाचनमा खटिएका कर्मचारीको सुरक्षाकोे दायित्व सरकारको भएकाले कुनैपनि राजनीतिक दल र उम्मेदवारहरुलाई सुरक्षा चाहिए सरकार सुरक्षा उपलब्ध गराउन सक्षम रहेको पनि बताए ।