काठमाडौं । उपप्रधान तथा अर्थमन्त्री विष्णु पौडेलले अर्थतन्त्रको सुधारको लागि निजी क्षेत्रसँग सहकार्य गरेर अघि बढ्ने कुरामा सरकारले ढिलो नगर्ने बताएका छन् । मंगलवार नेपाल उद्योग वाणिज्य महासंघ र नेपाल उद्योग परिसंघ (सिएनआई) का पदाधिकारीहरुसँगको भेटमा यस्तो बताएका हुन् ।

उनले अर्थतन्त्रमा सरकार निजी क्षेत्रले व्यहोरिरहेको समस्याको संवेदनशील रहेको पनि बताउनु भयो । उनले अर्थतन्त्रको समस्या समाधान गर्नेकुरामा सरकारले विलम्व गर्नु नहुनेमा आफू गम्भीर रहेको पनि बताए । अर्थमन्त्री पौडेलले आफूले निजी क्षेत्रका समस्या निजी क्षेत्र नै भएर हेर्ने र निजी क्षेत्रले पनि सरकार समस्या सरकार भएर हेर्नुपर्ने बताए । उनले निजी क्षेत्र र सरकार नदीका दुई किनारा नभइ एउटै नदी प्रणाली भएको बताए । मन्त्री पौडेलले निजी क्षेत्रको मनोबल टुटे र निजी क्षेत्रका समस्या समाधान नभए राष्ट्रिय अर्थतन्त्रमा ठूलो धक्का लाग्ने बताए । उनले निजी क्षेत्रका समस्या सुन्न राष्ट्र बैंक पनि लागेको बताए । उनले निजी क्षेत्रका प्रतिनिधिहरुलाई कमजोर नभइ उच्च मनोबल बनाएर अघि बढ्न आग्रह गरे ।

मन्त्री पौडेलले भने, ‘सरकार निजी क्षेत्रले व्यहोरिरहेको समस्याको संवेदनशील छ । यो समस्या समाधान गर्ने काममा हामीले विलम्व गर्नु हुँदैन भन्ने सरकार छ । सरकार हाम्राप्रति संवेदनशील छ भन्ने सोच्नुहोस् । तपाईहरु सरकार भएर हेर्नुहोस्, म निजी क्षेत्र भएर हेर्छु । हामी एउटै नदी प्रणाली हौँ । हामी नदीका दुई किनारा होइनौँ । निजी क्षेत्रको मनोबल टुट्यो र समस्या समाधान नभए त्यसले राष्ट्रिय अर्थतन्त्रमा ठूलो धक्का लाग्छ । निजी क्षेत्रका समस्या सुन्न राष्ट्र बैंक पनि लागेको छ । अबबाट मनोबल कमजोर बनाएर होइन, दरो मनोबलका साथ अघि बढ्नुहोला । समस्या समाधान हुनेछन् । देशले आर्थिक शंकटको अवस्था व्यहोरिरहेको स्थितिमा म निराशा थपेर पठाउन चाहन्न । समस्या गम्भीर पनि छन् । काबु बाहिर परिस्थिति गइसकेको छैन ।’

उनले अर्थतन्त्रमा देखिएका केही समस्या गम्भीर पनि रहेपनि अर्थतन्त्रको परिस्थिति नियन्त्रण बाहिर भने गइ नसकेको बताए । निजी क्षेत्रले अर्थमन्त्री पौडेललाई भेट्नुअघि प्रधानमन्त्री पुष्पकमल दाहालसँग भेटेर देशको अर्थतन्त्र र निजी क्षेत्रलाई सहयोग गर्न आग्रह गरेका थिए ।