काठमाडौं । सत्तारुढ नेकपा (एमाले)का सचिव रघुवीर महासेठले हत्याको आरोपमा फरार रहेका पार्टीका सांसद लक्ष्मी महतो कोइरीलाई पक्राउ गर्न आफ्नो पार्टीबाट कुनै पनि अवरोध नहुने स्पष्ट पारेका छन् ।

मंगलवार प्रतिनिधिसभा बैठकमा बोल्दै उनले अदालतले दोषी करार नगरेको भन्दै सांसद महतोलाई पक्राउ गर्ने हो भने त्यसमा आफ्नो पार्टीका कुनै पनि नेताहरुले बाधा, अवरोध नपुर्‍याउने समेत स्पष्ट पार्नु भयो । सचिव महासेठले शेरबहादुर देउवा नेतृत्वको सरकारले समाजसेवी पदक दिनका लागि सिफारिस गरेको व्यक्ति कसरी अपरोधी भयो ? पनि पटकपटक प्रश्न समेत गरे ।

महतोलाई महोत्तरीका शोषित पीडित जनताले लक्ष्मी पूजाको दिनमा लक्ष्मीलाई पुजा गरेर जसरी सम्मान गरिरहेको बेला उनमाथि अपराधी करार गर्ने काम सांसदहरुले गर्न नहुने उनको तर्क थियो ।

सचिव महासेठले नेपाली काँग्रेसका सांसद रामहरि खतिवडाप्रति लक्षित गर्दै सांसद महतो अपराधी हो भने देउवा नेतृत्वको सरकारले किन कारबाही गरेन ? भनेर विचार गर्न पनि आग्रह गरे । सांसद महतो हाल पार्टीको सम्पर्कमा नरहेको भन्दै उनले कानुन बमोजिम उनलाई कारबाही गर्न सरकारलाई पार्टीको तर्फबाट कुनै पनि अवरोध नहुने स्पष्ट पारे ।

सचिव महासेठले शेरबहादुर देउवा, केपी ओली, पुष्पकमल दाहालसहितका शीर्ष नेताहरुको नामै लिएर अपराधी भनेर आरोप लगाइएका नेताहरुले प्रधानमन्त्री भएर मुलुक चलाएको स्मरण गर्न पनि सांसदहरुलाई सचेत गराए । उनले अदालतले पुष्टि नगरेसम्म सांसद महतोलाई दोषी करार गर्ने काम नगर्न पनि अनुरोध गरे ।