काठमाडौं । नेपाल समाजवादी पार्टीका अध्यक्ष एवं पूर्व प्रधानमन्त्री डा. बाबुराम भट्टराईले लोकतन्त्रलाई सुदृढ बनाएर संस्थालाई मजबुत बनाउने कुरा नै अबको वैकल्पिक राजनीति भएको बताएका छन् ।

शुक्रवारबाट काठमाडौंमा शुरु भएको विवेकशील साझा पार्टीको पहिलो महाधिवेशनलाई सम्बोधन गर्दै उनले यस्तो बताएका हुन् ।

उनले अबको वैकल्पिक राजनीतिक कसैलाई फ्याँक्ने नभइ सबैलाई एकसाथमा अघि बढाउने र संस्थालाई मजबुत बनाउने रहेको बताए । उनले अबको वैकल्पिक राजनीति समावेशी र सहभागितामुलक लोकतन्त्र रहेको उल्लेख गरे । उनले अबको वैकल्पिक राजनीतिको एजेण्डा राज्यका प्रणालीहरुलाई बलियो बनाएर सुशासन कायम गर्नु रहेको बताए । उनले तेस्रो चरणको वैकल्पिक राजनीतिको एजेण्डा लोकतन्त्रलाई जोगाएर, लोकतन्त्रका अपूर्णतालाई पूर्ण बनाइ त्यसको जगमा देशलाई छोटो समयमा नै समृद्धिको मध्यमस्तरसम्म लैजनुपर्ने उल्लेख गरे ।

उनले भने, ‘अबको वैकल्पिक राजनीति भनेका सबैलाई फ्याँक्ने राजनीति होइन, संस्थालाई मजबुत बनाउने, सही अर्थमा पछिल्लो लोकतन्त्रको अभ्यास गर्ने, त्यो भनेको समावेशी र सहभागितामुलक लोकतन्त्र हो । त्यसलाई सही ढंगले प्रयोग गर्ने राज्यका जुन प्रणालीहरु छन्, यसलाई बलियो बनाएर यसको जगमा सुशासन ल्याउने हो । तेस्रो चरणको वैकल्पिक राजनीतिको एजेण्डा भनेको लोकतन्त्रलाई जोगाएर, लोकतन्त्रका अपूर्णतालाई पूर्ण बनाएर यसको जगमा अब हामीले देशलाई छोटो समयमा नै समृद्धिको मध्यमस्तरसम्म लैजानुपर्छ ।’

पूर्वप्रधानमन्त्री भट्टराईले अब देशलाई सुशासन र समृद्धिको दिशातर्फ अघि बढाउन ढिलो भइसकेको बताए ।