काठमाडौं । प्रमुख प्रतिपक्ष दल नेकपा (एमाले) ले नेपाली कांग्रेसविरुद्ध निर्वाचन आयोगमा उजुरी दिएको छ ।

उपराष्ट्रपतिको निर्वाचनको सन्दर्भमा कांग्रेसले गरेको निर्णयलाई लिएर उजुरी दर्ता गरिएको एमाले सचेतक महेशकुमार बर्तौलाले जानकारी दिए । ‘आचारसंहिता उल्लङ्घनको निर्णय गर्ने नेपाली कांग्रेसलाई कारबाहीको दायरामा ल्याउन निर्वाचन आयोगमा उजुरी गरेका छौँ,’ सचेतक बर्तौलाले भनेका छन् ।

गएराति १२ बजेबाट मौनअवधि सुरू भएको भएपनि कांग्रेसले उपराष्ट्रपतिको निर्वाचनलाई प्रभावित गर्नेगरी कुनै उम्मेदवरको पक्षमा निर्णय गरेर प्रचारप्रसार गरेको भन्दै उजुरी दर्ता गरिएको हो ।

‘उम्मेदवारको पक्षमा निर्णय गर्नु वा प्रचार गर्नु निर्वाचन आचारसंहिताविपरीत हुन्छ । तर, शून्य समय प्रारम्भ भइसकेको अवस्थामा कांग्रेसले बैठक बसेर निर्वाचन आचारसंहिताविपरीत उपराष्ट्रपतिमा रामसहाय प्रसाद यादवको पक्षमा मत हाल्न आफ्ना सांसदहरूलाई निर्देशन दिएको छ । यसले उपराष्ट्रपतिजस्तो गरिमामय पदको निर्वाचन आचारसंहिताको गम्भीर उल्लङ्घन भएको छ,’ सचेतक बर्तौलाले भनेका छन् ।

कांग्रेसको निर्णयले निर्वाचनको मर्यादा, स्वच्छता र निष्पक्षतालाई समेत कमजोर बनाएको आरोप एमालेको छ ।

यसअघि आजै बसेको कांग्रेसको कार्यसम्पादन समितिको बैठकले उपराष्ट्रपतिको निर्वाचनमा रामसहाय प्रसाद यादवलाई मतदान गर्ने निर्णय गरेको थियो ।