काठमाडौँ । शिक्षा, विज्ञान तथा प्रविधि मन्त्रालयका सचिव रामकृष्ण सुवेदीले सरकारले चासो नदेखाउँदा संघीय शिक्षा ऐन समयमै बन्न नसकेको बताएका छन् ।

शुक्रवार दिगो विकास तथा सुशासन समितिको बैठकमा बोल्दै सचिव सुवेदीले यसअघिको सरकारको मन्त्रीपरिषद्मा मन्त्रालयबाट सबै काम गरेर पुर्‍याए पनि मन्त्रीपरिषद्ले चासो नदिँदा पुनः शुन्यमा झरेको बताएका हुन् ।

उनले तत्कालीन शेरबहादुर देउवा नेतृत्वको सरकार हुँदा शिक्षा मन्त्रालयले सबै प्रक्रिया टुंग्याइ मन्त्रीपरिषद्मा पठाएको तर मन्त्रीपरिषद्ले चासो नदिएको बताए । उनले संघीय शिक्षा ऐन मन्त्रीपरिषद्मा पुगेको १ महिना पछि मात्रै मन्त्रीपरिषद्मा पुगेको नेपाल विश्वविद्यालय ऐन भने तत्काल संसदमा प्रश्तुत भएको भन्दै सरकारले चासो नदेखाउँदा संघीय शिक्षा ऐन निर्माणमा ढिलाइ भइरहेको बताए ।

उनले भने, ‘संघीय शिक्षा ऐनका सम्बन्धमा म शिक्षा मन्त्रालयमा आएको १० महिना भयो । म आउँदा संघीय शिक्षा ऐन अर्थ मन्त्रालयमा थियो । राय परामर्शको लागि थियो, मैले त्यसलाई कानून मन्त्रालयमा पठाएर कानून मभन्त्रालयले ड्राफ्टिङको सहमति दिएर क्याबिनेटमा लगेको थियो । अघिल्लो सरकारको पालामा । तर त्यही क्याबिनेटमा संघीय शिक्षा ऐन एक महिनाअघि पुगेको थियो, नेपाल विश्वविद्यालय एक महिना पछि पुगेको थियो । नेपाल विश्वविद्याय क्याबिनेटबाट पास भएर संसदमा दर्ता भयो, संघीय शिक्षा ऐन त्यहाँबाट हिँडेन, शिक्षा सचिवले त्यहाँबाट हिँडाउन नसक्दो रहेछ, म नाजवाफ छु, सरकार परिवर्तन भएपछि जिरोमा आएको छ, फेरि कानून मन्त्रालयमा पुगेको छ, अब त्यहाँबाट आएपछि हामी क्याबिनेटमा लगेर चाँडै संसदमा प्रश्तुत गर्नेछौँ । कानून मन्त्रालयमा पठाएको पनि तीनदेखि ४ महिना भयो ।’

सचिव सुवेदीले यस वर्ष समयमा नै देशभर पाठ्यपुस्तक पुगेको दाबी गरे । उनले केही ठाउँमा साना समस्या भएपनि त्यसलाई समाधान गर्न लागिपरेको बताए । उनले पाठ्यपुस्तक वितरणमा पनि कुनै समस्या नदेखिएको बताए ।

उनले भने, ‘कहीँ कतै छिटफुट कुराहरु आएका छन् तर हामी के दाबी गरिरहेका छौँ भने अहिले पाठ्यपुस्तक समयमा पुगेको छ, हिमाल, पहाड, तराई सबै ठाउँमा पुगेको छ । एकाध समस्या छन्, त्यसलाई सल्ट्याउँदै छौँ । हामीले १–५ को हकमा एउटा व्यवस्था गरेका थियौँ, ६–१२ को हकमा अर्को व्यवस्था गरेका छौँ । ६–१२ जनक शिक्षा सामग्रीले लिड गरेको छ भने १–५ निजी क्षेत्रलाई समेत दिएर पार्टनरसिपमा काम गरेका हौँ । त्यसै अनुरुप छपाइ भएका पाठ्यपुस्तकहरु १२६७ वटा वितरकहरुमार्फत देशभर नै वितरण भएको छ । यसमा खासै समस्या आएको देखिएको छैन ।’

सचिव सुवेदीले कक्षा १ देखि ५ निजी क्षेत्रलाई र कक्षा ६ देखि १२ जनक शिक्षा सामग्रीको सहकार्यमा काम गर्दा सबै क्षेत्रमा समयमा नै पुस्तक पुगेको बताए ।