काठमाडौं । मलेसियाविरुद्धको दोस्रो खेलमा पनि नेपाली महिला क्रिकेट टोलीले जित निकालेको छ ।

पाँच खेलको सिरिज अन्तर्गत आज भएको तेस्रो खेलमा घरेलु टोली मलेसियालाई २७ रनले पराजित गर्दै नेपालले दुई खेलमा जित निकालेको हो ।

मलेसियाको बांगीस्थित युएसडी युकेएम ओभलमा टस हारेर पहिले ब्याटिङ गरेको नेपालले निर्धारित २० ओभरमा पाँच विकेट गुमाएर ११० रन बनाएको हो ।

नेपालका लागि कप्तान रुबिना क्षेत्रीले सर्वाधिक २७ रन बनाइन् । त्यस्तै ज्योति पाण्डे २३ रनको योगदान दिँदा इन्दु बर्माले २० रन बनाइन् । कविता कुँवर दुई रनमा आउट हुँदा कविता जोशी एक रन तथा विन्दु रावल तीन रनमा अविजित रहिन् ।

मलेसियाका लागि निक नुर अटिएलाले दुई तथा आयसा इलिसा र विनफ्रेड अन्नेले समान एक एक विकेट लिएक थिए ।

नेपालले दिएको १११ रनको लक्ष्य पछ्याएको मलेसियाले निर्धारित ओभरमा चार विकेट गुमाउँदै ८३ रन मात्र बनाउन सक्यो । मलेसियाका लागि माहिरा इजाति इस्मेइनलले अविजित ४४ रन बनाइन् ।

त्यस्तै आइना नजवा ९ रनमा अविजित रहिन् । विनफ्रेड अन्नेले २० रनको योगदान दिँदा वान जुलिया ६ तथा मास इलस्या दुई रनमा पविलियन फर्किइन् ।

मलेसियालाई रोक्न नेपालका लागि कविता कुँवर, सिता रानामगर र इन्दु बर्माले समान एक एक विकेट लिए ।

नेपाल पहिलो खेलमा इतिहासमै पहिलो पटक मलेसियासँग पराजित भएको थियो ।

पहिलो खेल मलेसियाले पाँच विकेटले जितेको थियो । दोस्रो खेलमा नेपालले पुनरागमन गर्दै सात विकेटले जितेको थियो । नेपाली महिला टोली पाँच टि–२० श्रृंखलाका लागि मलेसिया भ्रमणमा रहेको छ । नेपालले चौथो खेल ३ जुनमा खेल्नेछ ।