काठमाडौं । नेपाल कम्युनिस्ट पार्टीका महासचिव नेत्रविक्रम चन्दले समाजवादी मोर्चा निर्माण नेपाली राजनीतिको लागि नयाँ मोड भएको बताएका छन् ।

सोमवार काठमाडौंमा आयोजित समाजवादी मोर्चा नेपाल घोषणा कार्यक्रमलाई सम्बोधन गर्दै महासचिव चन्दले मोर्चा निर्माण नेपाली राजनीतिको लागि नयाँ मोड भएको बताएका हुन् । उनले सरकारमा भएको र संघर्षमा रहेको पार्टीको बीचमा मोर्चा बन्नु नेपालको इतिहासकै नयाँ प्रयोग भएको बताए ।

उनले देशको राजनीति अत्यासलाग्दो परिस्थितिमा गुज्रिएको भन्दै देशलाई त्यसबाट मुक्त पार्नका लागि समाजवादी मोर्चा बनेको बताए । नेपाल अग्रगमन र पश्चगमनबीचको लडाँइमा उभिएको भन्दै उनले प्रतिगामी र पश्चगामीहरुलाई मौकाको फाइदा उठाउन नदिनका लागि मोर्चा बनेको उल्लेख गरे । महासचिव विप्लवले देशको नेतृत्व अग्रगामीहरुले गर्ने बताए । उनले देशको नेतृत्व समाजवादी मोर्चाले गर्ने बताए ।

उनले भने, ‘नेपाललाई आजको परिस्थितिबाट मुक्त गर्नुपर्छ, कुनैपनि मुल्यमा आजको संकटबाट प्रतिगामी र पश्चगामीहरुलाई मौकाको फाइदा उठाउन दिनु हुँदैन । कुनैपनि स्थितिमा हाम्रो देशमाथि आँखा लगाउने साम्राज्यवादीलाई कुनैपनि स्थितिमा स्वीकार गर्न सकिँदैन । नेपालको स्वाधिनता र नेपाली जनताको अधिकारको लागि एउटा नयाँ संघर्ष, लडाइँ अगाडी बढाउनुपर्छ भन्ने सोचका साथ इतिहासमा हामीले एउटा नयाँ अभ्यास अगाडी ल्याएका छौँ, समाजवादी मोर्चा नेपाल । यो नेपाली राजनीतिको एउटा नयाँ मोड हो । नयाँ प्रयोग हो यो । यो नेपालको इतिहासमा कमै प्रयोग भएको छ र यसरी प्रयोग भएको छैन । सरकारमा भएको पार्टी पनि यहाँ हुनुहुन्छ र हामी जनताको बीचमा भएका, संघर्ष गरिरहेका पार्टीहरु पनि यहाँ पनि छौँ । यो एउटा संयोग हो । नेपालको इतिहासमा एउटा संयोग बन्न आइपुगेको छ । ७ बुँदे घोषणापत्र लिएर तपाईहरुको बीचमा उपस्थित भएका छौँ । पूर्ण आत्मविश्वासका साथ हामीले दाबी गरेका छौँ, यो देशको नेतृत्व अग्रगामीहरुले गर्ने हो । यो देशको नेतृत्व समाजवादी मोर्चाले गर्ने हो । देशको नेतृत्व देशभक्त स्वाभिमानी नागरिकहरुले गर्ने हो । हामी सक्छौँ । तपाईहरुको विश्वासबाट । तपाईहरुको उत्साहबाट हामी साँच्चै नै तरंगित पनि छौँ । जिम्मेवारीबोध पनि भइरहेको छ ।’

महासचिव चन्दले देशमा नयाँ पुस्ताहरुलाई निराश बनाएर नेपालको अस्मिता लुट्ने कोशिस भएको बताए । उनले युवा पुस्तालाई बेचैन बनाएर गलत बाटोमा भड्काउने, कुलतमा फसाउने पनि कोशिस भइरहेको भन्दै सचेत गराए । उनले नेपालीहरु स्वाधिन बन्न चाहाने उल्लेख गर्दै कसैको गुलाम स्वीकार्य नहुने स्पष्ट पारे ।

उनले भने, ‘म यहाँबाट अपील गर्न चाहन्छु, आउँदो भविष्य कुनैपनि मुल्यमा शासकहरुको हुन सक्दैन । कुनैपनि मूल्यमा प्रतिगामीहरुको हुन सक्दैन । कुनैपनि मूल्यमा विदेशी तत्वहरुको, साम्राज्यवादीहरुको हुन सक्दैन । नेपालको भविष्य नेपाली जनताको हो । नेपाली जनताले सुनिश्चित गर्नुपर्छ । त्यो विश्वास गर्न चाहन्छु । आज नयाँ पुस्तालाई निराश बनाएर नेपालको अस्मिता लुट्ने, नेपालको स्वाधिनता समाप्त पार्ने, युवा पुस्तालाई बेचैन बनाएर गलत बाटोमा भड्काउने, कुलतमा फसाउने, लुट्ने, एक्काइसौँ शताब्दीको गुलाम बनाउने हामी नेपालीलाई । हामी स्वाधिन बन्न चाहान्छौँ । हामीले भनेका छौँ हामी कुनैपनि देशमा हामीलाई कुनै चासो छैन । तर यो देशमा हामी मान्छे भएर बाँच्न चाहन्छौँ । कसैको गुलाम हुन हामीलाई स्वीकार्य छैन । कुनैपनि देशको गुलामी बन्न हामीलाई स्वीकार्य छैन । त्यो आँट नेपालको युवा पुस्ताले एकचोटी गर्नु जरुरी छ । निराश भएर होइन । अग्रगमन सम्भव छ । हरेक उज्यालो अध्याँरोसँग लडेर मात्र सम्भव छ । हरेक सफलता जटिलताहरुसँग लडेर मात्रै सम्भव छ । हरेक सफलता असफलताहरु सँग भिडेर मात्र सम्भव छ । त्यसैले समाजवादी मोर्चा बनेको छ ।’

उनले आगामी दिनमा मोर्चाले देशलाई आशा जघाउने काम गर्ने बताए । मोर्चाले शहीद तथा बेपत्ताहरुको समाजवाद स्थापना गर्ने सपनालाई साकार पार्ने बताए । उनले मोर्चाले देशमा भएका राजनीतिक परिवर्तनहरुको रक्षा गर्ने बताए ।