काठमाडौं । प्रधानमन्त्री पुष्पकमल दाहाल ‘प्रचण्ड’ ले संघीय सरकारका मन्त्रीहरूसँग कार्यसम्पादन सम्झौता गरेका छन् । अब सरकारले कार्यसम्पादन मूल्यांकनको आधारमा मन्त्रीहरुको कामको मासिक रिपोर्ट कार्ड समेत बनाउने भएको छ ।

आज (बिहीबार) प्रधानमन्त्री तथा मन्त्रिपरिषदको कार्यालयमा प्रधानमन्त्री प्रचण्डले आर्थिक वर्ष २०८०/८१ को वार्षिक कार्यक्रमको प्रभावकारी कार्यान्वयन गर्नका लागि मन्त्रीहरूसँग कार्यसम्पादन सम्झौता हस्ताक्षर गरेका हुन् ।

संघीय सरकारका २१ जना मन्त्रीले आफ्नो नेतृत्वमा रहेको मन्त्रालयले गर्ने कार्यको कार्यसूचीसहित प्रधानमन्त्रीसँग सम्झौता गरेका छन् ।

सम्झौतापत्रमा हासिल गर्नुपर्ने नतिजा सूचक तोकिएको छ, जसअनुसार आर्थिक वर्ष २०७९/०८० को समग्र स्थिति र आर्थिक वर्ष २०८०/०८१ को लक्ष्य पनि निर्धारण गरिएका छन् ।

सम्झौतापत्रमा गर्नुपर्ने प्रमुख कामहरु बताइएको छ, जसमा कार्यक्रम र क्रियाकलापको सूची र सो जिम्मेवारी पूरा गर्नुपर्ने समयसीमा समेत उल्लेख गरिएको छ ।

सम्झौताअनुुसार कार्यसम्पादनको प्रगति मासिक रूपमा प्रधानमन्त्री कार्यालयमा अनलाइन प्रणालीबाट पठाउनुपर्ने र त्यसलाई मासिक तथा वार्षिक प्रतिवेदन र मूल्यांकनको आधार बनाइने छ ।

कार्यसम्पादन सम्झौताको अवधि १ वर्ष कायम गरिएको छ। सम्झौता अवधिभरमा मन्त्रीको पद रिक्त भएमा नयाँ नियुक्त हुने मन्त्रीले यस सम्झौता मुताबिक बाँकी काम गर्नुपर्नेछ ।

कार्यसम्पादन सम्झौतामा हस्ताक्षरपछि प्रधानमन्त्री प्रचण्डले तोकिएको कार्यादेश र कार्यविवरणबमोजिम प्रभावकारी कार्य गर्न मन्त्री र सचिवहरूलाई निर्देशन दिए ।