काठमाडौं । राजधानीको लाजिम्पाटमा रहेको पाँचतारे र्‍याडिसन होटल क्षमता विस्तार गरिरहेको छ । होटलले ३० कोठा भएको अपार्टमेन्ट ब्लक निर्माण गरिरहेको छ ।

अपार्टमेन्ट ब्लक आगामी सन् २०२५ भित्र सम्पन्न हुने ओरियन्टल होटल्स लिमिटेडले जनाएको छ । होटलको क्षमता अझ बढेपछि पिक सिजनको मागलाई पूरा गर्ने छ । होटल पूर्वाधार थप्न र्याडिसनले १ अर्ब ६० करोड ३० लाख रुपैयाँ ऋणको रेटिङसमेत गराएको छ । होटलको अहिले २ सय ६० कोठा रहेको छ ।

होटलले ऋण लिएर क्षमता विस्तार गरिरहेको छ । जबसम्म आम्दानी समान रूपमा बढ्दैन तबसम्म थपिएको ऋण बोझले कम्पनीको वित्तीय र ऋण कभरेज मेट्रिक्सलाई दबाब दिने सम्भावना छ । सेवा सञ्चालनमा आएपछि आम्दानीमा सुधार आउने अपेक्षा गरिएको छ ।

र्‍याडिसनको व्यापार ९५ प्रतिशत बढ्यो

क्षमता विस्तारमा लागेको र्‍याडिसन होटलको व्यापार ९५ प्रतिशत बढेको छ । र्‍याडिसनका सञ्चालक ओरियन्टल होटल्स लिमिटेडका अनुसार गत वर्ष १ अर्ब २१ करोड १० लाख रुपैयाँको व्यापार गरेको छ । अघिल्लो वर्ष २०२२ मा र्याडिसनले ६२ करोड २० लाख रुपैयाँको मात्रै व्यापार गरेको थियो ।

एक वर्षको अवधिमा र्‍याडिसनको व्यापार झण्डै ५९ करोड रुपैयाँ बढेको सार्वजनिक गरिएको वित्तीय विवरणमा उल्लेख छ । होटलको कोठा, फूड एन्ड बेभरेज, ब्याँकेट हलका साथै त्रिभुवन अन्तर्राष्ट्रिय विमानस्थलमा भएको लाउन्जबाट राम्रो आम्दानी गरेको होटलले जनाएको छ । कोभिड महामारीपछि होटलको व्यापार विस्तारै लयमा फर्किएको वित्तीय विवरणले देखाएको छ ।

२०२१ मा १३ करोड १० लाख, २०२० मा ७८ करोड ८० लाख रुपैयाँ व्यापार गरेको थियो । यस्तै २०१९ मा १ अर्ब ३२ करोड ७० लाख रुपैयाँको व्यापार गरेको थियो ।

र्‍याडिसन होटलको स्थापना सन् १९९४ मा भएको हो । १९९९ मा पब्लिक लिमिटेडमा रुपान्तरण भएको हो । होटल नेपाल स्टक एक्सचेन्ज (नेप्से) मा सूचिकृत छ । होटल त्रिभुवन अन्तर्राष्ट्रिय विमानस्थलबाट ५ किलोमिटर दुरीमा रहेको छ । होटलको व्यवस्थापन विश्वव्यापी चेन र्‍याडिसन होटल्स ग्रुपको छ ।

होटलको बहुमत स्वामित्व श्रेष्ठ परिवारिको स्वामित्वमा रहेको छ । ओरियन्टल होटलमा श्रेष्ठ परिवारको ७० प्रतिशत सेयर रहेको छ । स्थानीय बजार र सरोकारवालाहरूसँग उच्चस्तरीय होटल सञ्चालन र तिनीहरूको आकर्षण सकारात्मक रहेको छ।

र्याडिसनसँगको फ्रेन्चाइजी सम्झौताअनुसार सन् १९९९ देखि आफ्नो होटल र्‍याडिसन ब्रान्ड अन्तर्गत सञ्चालन गर्दै आएको छ ।