काठमाडौं । प्रमुख प्रतिपक्ष दल नेपाली कांग्रेसका सांसद अजयकुमार चौरसियाले मधेसमा खानेपानीलगायतका समस्या तत्काल समाधान गर्नका लागि सरकारलाई रुलिङ गर्न सभामुख देवराज घिमिरेको ध्यानाकर्षण गराएका छन् । आईतबार प्रतिनिधि सभा बैठकको शुन्य समयमा बोल्दै उनले सो माग गरेका हुन् ।

सांसद चौरसियाले आँधि, तुफान, हावाहुरी, असिनाका कारण पनि मधेशको जनजीवन कष्टकर हुँदा पनि सरकारले बेवास्ता गरेको भन्दै आपत्ति जनाए । उनले भैँसीको अगाडि वीन बजाएजस्तो सरकारले नागरिकलाई पीडा हुँदा पनि ध्यान नदिएको गुनासो गरे ।

सांसद चौरसियाले भने, ‘मधेशमा खानेपानीको समस्या भएको छ । मुहानहरु सुक्दै गएका छन । र पानीको लागि त्राहीमाम छ । हाहाकार छ । अर्कोतिर आँधि, तुफान, हावाहुरीको कारणले, असीनाको कारणले घर उठाएको छ । खेतीपाती नोक्शान भएको छ ।

बगैँचा नोक्शान भएको छ । र पटक पटक मैले यो पार्लियामेन्टमा यी कुराहरु उठाएको छु । तर सरकार कानमा तेल हालेर सुतेको छ । सम्माननीय सभामुखबाट रुलिङ होस । मधेशमा एउटा उखान छ–भैंसका आगे विन बजाय । त्यस्तो नहोस । र संसद सचिवालयका कर्मचारीहरुको जायज माग अभिलम्व पूरा गरियोस् ।’

सांसद चौरसियाले संसद सचिवालयका कर्मचारीको जायज माग तत्काल सम्बोधन गर्न पनि सरकारलाई सचेत गराए ।