काठमाडौं । राष्ट्रिय प्रजातन्त्र पार्टीकी सांसद रोशन कार्कीले संघीय संसद सचिवालयका कर्मचारीहरुको न्यायोचित माग सम्बोधन गर्न सरकारसँग आग्रह गरेकी छन् । आईतबार प्रतिनिधि सभा बैठकको आकस्मिक समयमा बोल्दै सांसद कार्कीले संघीय संसद सचिवालयका कर्मचारीहरुको न्यायोचित मागलाई सम्बोधन गर्नुपर्ने बताएकी हुन् ।

उनले कर्मचारीहरुले अतिरिक्त समयमा गरेको कामको भत्ता नपाएका र सरुवा पनि नहुने भन्दै उनीहरुमाथि अन्याय गर्नु नहुने बताइन् । उनले कर्मचारीहरुको माग पुरा गर्न अर्थमन्त्रीको ध्यानाकर्षण गराइन् ।

उनले भनिन् – ‘संसदभित्र हामीहरुलाई सुविधा सम्पन्न गर्ने, हाम्रो कामहरु छिटो छरितो गर्ने, संसद चलेको बेलामा बेलुकासम्म बसेर हामीलाई सहयोग गर्ने हाम्रा सहयोगी हातहरु आज प्लेकार्ड बोकेर बाहिर बसेका छन् । उनीहरुले पाउनुपर्ने ओभरटाइम पनि पाएका छैनन् । उनीहरुको सरुवा पनि हुँदैन । उनीहरु माथि कस्तो अन्याय हो सरकारको ? अर्थमन्त्रीज्यूलाई भन्न चाहान्छु, दिएको बजेट मन्त्रालयहरुले कत्तिको सदुपयोग गरेको छ पुर्नविचार गर्नुस् । र कर्मचारीहरुको न्यायोचित मागलाई पुरा गर्नुपर्छ । कसैको पनि श्रम शोषण गर्नुपर्छ ।’

त्यस्तै आकस्मिक समयमा बोल्दै नेकपा(एमाले)का सांसद ऋषिकेश पोखरेलले स्वास्थ्य बीमा दर्ता सहयोगीहरु विभिन्न माग राखी स्वास्थ्य बीमा बोर्डमा आएका भन्दै उनीहरुको मागको सम्बोधन गर्नुपर्ने बताए ।

उनले जेठ ६ गते स्वास्थ्य बीमा बोर्डमा आफ्नो माग लिएर जाँदा दमन गरिएको भन्दै दमन गर्नेलाई कारबाही गर्न पनि माग गरे ।