काठमाडौं । नेपाली कांग्रेसले पूर्वसभापति तथा शान्ति प्रक्रियाका हस्ताक्षरकर्ता गिरिजाप्रसाद कोईरालाको शताब्दी जन्मजयन्तीको अवसरमा फोटो प्रदर्शनी गर्ने भएको छ । कांग्रेसले अगामी असार १८ गते पूर्वसभापति गिरिजाप्रसाद कोईरालाको शताब्दी जन्मजयन्तीको अवसर पारेर फोटो प्रदर्शनी गर्ने भएको हो ।

बुधवार पत्रकार सम्मेलन गर्दै केन्द्रिय सूचना, सञ्चार तथा प्रचार विभागको आयोजनामा फोटो प्रदर्शनी गर्न लागिएको जानकारी गराइएको हो । ‘क्रान्तिदेखि शान्तिसम्म’ नाम दिइएको फोटो प्रदर्शनीमा १५० वटाभन्दा बढी फोटोहरु रहने केन्द्रिय सूचना, सञ्चार तथा प्रचार विभाग प्रमुख मिन विश्वकर्माले जानकारी दिए । फोटो प्रदर्शनीमा क्रान्तिको समय, शान्तिकालिन समय र शान्ति प्रक्रियाको समयलाई प्रतिविम्वित गर्ने फोटोहरु राखिने उनले बताए ।

नेपालको शान्ति प्रक्रियामा गिरिजाप्रसाद कोईराला लगायतका नेपाली कांग्रेसका नेताहरुले खेलेका भुमिकालाई फोटोमा उतार्ने प्रयास गरिएको उनले बताए । उनले पार्टीको केन्द्रिय कार्यालयकै सभाहलमा हुने फोटो प्रदर्शनीका लागि प्रधानमन्त्री, पूर्वप्रधानमन्त्रीहरु, विभिन्न पार्टीको अध्यक्ष तथा शिर्ष नेताहरुदेखि कुटनीतिक क्षेत्रका व्यक्तिहरुलाई पनि निमन्त्रणा गरिएको जानकारी दिए । बिहान ११ बजेदेखि शुरु हुने फोटो प्रदर्शनी राति ११ बजेसम्म चल्ने उनले बताए ।

उनले भने– नेपाली काँग्रेस केन्द्रिय कार्यसमिति, केन्द्रिय सूचना, सञ्चार तथा प्रचार विभागको आयोजनामा शान्ति प्रक्रियाका महानायक शिखर पुरुष गिरिजाप्रसाद कोईरालाको शताब्दी जन्मजयन्तीको अवसरमा नेपाली काँग्रेस केन्द्रिय कार्यालयको परिसरमा असार १८ गते गिरिजाप्रसाद कोईरालाको जीवनीसँग जोडेर र नेपाली कांग्रेसका नेताहरुले नेतृत्व गरेका क्रान्ति र शान्ति प्रक्रिया समेतलाई एकैपटक जनताका बीचमा जानकारी गर्ने, सन्देश दिने उद्देश्यका साथ क्रान्तिदेखि शान्तिसम्म भनेर फोटो प्रदर्शनी कार्यक्रम गर्दैछौँ ।

त्यही कार्यक्रमसँग जोडेर केही विषयमा विमर्श पनि गर्दैछौँ । क्रान्तिदेखि शान्तिसम्म, समुन्नतिको दोस्रो जग, फोटो पत्रकारिताः जोखिम र अनुभव विषयमा विमर्श गर्नेछौँ । १५० भन्दा बढी फोटोहरु रहनेछन् । जुन फोटोहरु २००७ सालभन्दा अगाडीका र गिरिजाबाबुसहित अन्य नेताहरुको पनि फोटो रहनेछ । १५० फोटोहरुले तीन किसिमको चरणहरुको प्रतिविम्वित गर्नेछ । एउटा क्रान्तिको बेलामा, शान्ति अथवा विकासको बारेमा र पछि शान्ति प्रक्रियासँग जोडिएका फोटोहरु हुनेछन् ।

फोटो प्रदर्शनीको अलावा क्रान्तिदेखि शान्तिसम्म, समुन्नतिको दोस्रो जग, फोटो पत्रकारिताः जोखिम र अनुभव विषयमा विमर्श पनि गरिने उनले जानकारी दिए । क्रान्तिदेखि शान्तिसम्मको विषयमा पूर्वप्रधानमन्त्री डा. बाबुराम भट्टराई, नेपाली कांग्रेसका नेता कृष्णप्रसाद सिटौला र एमालेका नेता प्रदीप ज्ञवालीले विमर्श गर्ने बताए ।