काठमाडौं । व्यवसायी दीपक मल्होत्राले राजधानीको टोखामा होटलसहितको आवासीय अपार्टमेन्ट परियोजना निर्माण थालेका छन् । उनले टोखामा रहेको होटल शहनशाह इन्टरनेशनल प्राइभेट लिमिटेडलाई होटलसहितको अपार्टमेन्ट बनाएका हुन् ।

अहिले २५ कोठमा भएको होटल निर्माण भइरहेको छ । यस्तै २.१३ एक्कड जमिनमा अपार्टमेन्ट ब्लक १, २ र ३ गरी ९० युनिट अपार्टमेन्ट बनाउने तयारीमा छन् । ब्याँकेट एक वर्षभित्र सञ्चालनमा आउने भएको छ । इन्टेरियरको काम जारी रहेको छ । अपार्टमेन्ट खण्डको गहिरो विश्लेषण संरचना रेखाचित्रको चरणमा मात्र प्रगति भएको छ । आउँदाे ४ महिनाभित्र अपार्टमेन्ट परियोजनाको काम सुरु हुने अनुमान गरिएको छ ।

आउँदो ३ वर्षको समयरेखाभित्र अपार्टमेन्ट परियोजना पनि सम्पन्न गर्ने लक्ष्य छ । होटल र अपार्टमेन्ट परियोजना बनाउन ३ अर्ब ३७ करोड ३० लाख रुपैयाँ लगानी हुने भएको छ । होटल शहनशाहमा ५६ प्रतिशत बैंकको ऋण र बाँकी ४४ प्रतिशत संस्थापकहरुको स्वपुँजी हुनेगरी लगानी संरचना तयार पारिएको छ । जसअनुसार १ अर्ब ९० करोड रुपैयाँ बैंकबाट ऋण र बाँकी १ अर्ब ४७ करोड ३० लाख रुपैयाँ स्वपुँजी लगानी हुने होटल सहनशाहले जनाएको छ । बैंकको ऋण लगानीको व्यवस्थापन भइसकेको छ । परियोजनाले २ अर्ब २० करोड रुपैयाँ ऋणको रेटिङ गराएको छ ।

आयोजनालाई दुई भागमा विभाजन गरिएको छ । होटल र ब्याँकेट हुने भएको छ । निर्माणाधीन भित्री कामसँगै यसको निर्माण कार्य सम्पन्न हुने क्रममा रहेकोले एक वर्षभित्र सञ्चालनमा आउनेछ । अपार्टमेन्ट खण्डको लागि निर्माण सुरु हुन बाँकी छ ।

नेपालको होटल उद्योग ठूलो संख्यामा संगठित र असंगठित खेलाडीहरूको उपस्थितिले प्रतिस्पर्धा बढाएको छ । काठमाडौं उपत्यकामा सञ्चालित होटलको संख्या अझै उच्च रहेको छ । होटल त्रिभुवन अन्तर्राष्ट्रिय विमानस्थलबाट ७ किलोमिटर दुरीमा रहेको छ । होटल शहनशाह इन्टरनेशनल सन् १९९६ मा स्थापना भएको हो ।

मल्होत्र आइएमएस ग्रुपका अध्यक्ष हुन् । आइएमएसले सूचना प्रविधिका साथै नेपालमा सामसङ मोबाइल बिक्रीवितरण गर्दै आएको छ । सामसुङलाई नेपालमा ब्राण्डका रूपमा स्थापित गरेका व्यवसायी मल्होत्रा गाडी, मोबाइल र जलविद्युतसहित दर्जनौँ व्यवसायमा आवद्ध छन् ।

त्रिभुवन अन्तर्राष्ट्रिय विमानस्थलको पार्किङ व्यवस्थापनदेखि मोबाइल वालेट सेलपेससम्मको बिजनेस मल्होत्राले गर्दै आएका छन् । उनको अनलाइन सपिङ मार्केट स्मार्ट डोको पनि सञ्चालनमा छ । उनले टाइम्स इनर्जी प्रालिमार्फत ३ सय ४१ मेगावाट क्षमताको बुढीगण्डकी अर्धजलाशय जलविद्युत आयोजनाको स्वामित्व बिक्री गरेका छन् ।

राजधानीको कालिकास्थानमा सिल्भर सिटी अपार्टमेन्ट निर्माण गरी सञ्चालन गरिरहेका दीपकले अहिले घरजग्गा व्यवसायलाई नेपालको पहिलो पब्लिक कम्पनी बनाएका छन् ।

मल्होत्राले पहिलो पब्लिक कम्पनी नेपाल रियल इस्टेट म्यानेजमेन्ट लिमिटेड दर्ता पनि गरेका छन् । हाउजिङ, अपार्टमेन्ट र प्लटिङसहित रियल इस्टेटसँग सम्बन्धित सबै क्षेत्रको काम गर्नेगरी कम्पनी स्थापना गरेका हुन् ।  कम्पनीको पुँजी ५ अर्ब रूपैयाँ छ ।