काठमाडौं । शहरी विकास मन्त्री धनबहादुर बुढाले आफूले सांसदहरुको माग सम्बोधन हुने गरी मन्त्रालयगत बजेट विनियोजन गरेको बताएका छन् । बिहीबार राष्ट्रिय सभा बैठकमा सांसदहरुले मन्त्रालयगत बजेटमाथि उठाएका प्रश्नको जवाफ दिने क्रममा उनले सो दाबी गरेका हुन् ।

मन्त्री बुढाले बजेट विनियोजनमा क्षेत्रीय सन्तुलन, मानव विकास सूचकांक, सहरी विकास रणनीति, सरकारको नीति तथा कार्यक्रम र १६ औँ पञ्चवर्षीय योजनाले दिशा निर्देश गरेको विषयहरुलाई आधार बनाइएको पनि बताए । उनले जनता आवास कार्यक्रम संचालन गर्ने जिम्मेवारी प्रदेश सरकारलाई दिइएको बताए ।

मन्त्री बुढाले भने, ‘जनता आवास कार्यक्रमको जिम्मेवारी प्रदेश सरकारलाई दिइएको छ । माननीयज्युहरुले माग गर्नुभएको कार्यक्रम सम्बोधन गर्ने प्रयास गरेको छु । बजेट विनियोजनमा क्षेत्रीय सन्तुलनको अतिरिक्त मानव विकास सूचकांक, शहरी विकास रणनीति, सरकारको नीति तथा कार्यक्रम र १६ औ पञ्चवर्षीय योजनाले दिशा निर्देश गरेको विषयहरुलाई आधार बनाइएको छ ।’

मन्त्री बुढाले मन्त्री निवास, संघीय संसद भवन निर्माणलगायतका ठूलो परियोजनाहरु रहेकाले वागमती प्रदेशमा अन्य प्रदेशमा भन्दा बढी बजेट विनियोजन गरिएको देखिएको स्पष्ट पारे ।