दाङ । दाङको शान्तिनगर गाउँपालिका वडा नं. २ मा पहिलो पटक सर्वाधिक राशीको १५ वर्ष मूनिको खुल्ला फुटबल प्रतियोगिता सञ्चालन हुने भएको छ । स्वास्थ्यका लागी खेलकुद राष्ट्रका लागी खेलकुद भन्ने मूल नाराका साथ शान्तिनगर गाउँपालिका वडा नं. २ को बाघमारे फुटबल क्लबले सो प्रतियोगिताको आयोजना गरेको हो ।

प्रतियोगितामा दाङ जिल्लाभरिका १५ वर्ष मूनिका सबै विद्यालय तथा क्लबहरुलाई आह्वान गरिएको छ । खेलमा १५ वर्ष मूनिका मात्रै खेलाडी समावेश हुन पाउने छन् । उक्त प्रतियोगितमा टिम दर्ता गर्नको लागि २ हजार रुपैयाँ शुल्क लाग्ने छ ।

सो प्रतियोगितामा विजेता टोलिले नगद २० हजार रुपैयाँ प्राप्त गर्ने छन भने उपविजेता टोलिले नगद ८ हजार रुपैयाँसहित मेडल र प्रमाणपत्र पनि प्राप्त गर्ने छन । खेल श्रावण ४ गते देखी शान्तिनगरको सिम सुन्दरपुर खेल मैदानमा सुरु हुने छ । प्रतियोगितामा समावेश हुनका लागी सबै टोलिले श्रावण १ गते दिउँसो ३ बजे सम्म टिम दर्ता गरिसक्नुपर्ने छ ।

त्यसैगरी साउन २ गते साझँ ४ बजे खेल तालिका प्रकाशन हुने कार्यक्रमका संयोजक विशाल विष्टले जानकारी दिए । खेलमा २२ जना सम्म खेलाडी सम्मिलित हुन सक्ने छन् । खेल अवधिभर प्रत्येक खेलमा म्यान अफ दी म्याच घोषणा गरिनुका साथै सर्वाधिक गोलकर्ता, उत्कृष्ट डिफेन्स, उत्कृष्ट फवार्ड, उत्कृष्ट मिड फिल्ड, उदयमान खेलाडी र उत्कृष्ट गोलरक्षक लाई पनि आकर्षक पुरस्कारको व्यवस्था गरिएको छ ।

खेल खेल्नु भन्दा अगाडी प्रत्येक खेलाडीले जन्मदर्ता र आमाबुवाको नागरिकताको १ प्रति फोटोकपी पेश गर्नुपर्ने छ ।