काठमाडौं । सेयर बजार घटे पनि सोमबार कारोबारमा नयाँ रेकर्ड कायम भएको छ । सामान्य करेक्सन आउँदा सेयर बजार २०.४६ अंक घटेर नेपाल स्टक एक्सचेन्ज (नेप्से) सूचक २६.६१ अंकमा झरेको छ । बजार २६ सय ९५ विन्दुमा पुगेर पुनः ओरालो लागेको थियो । कारोबार रकममा चमक आए पनि नेप्से सूचक हरियो र रातो भइरह्यो ।

दोस्रो दिन सोमबार १९ अर्ब ६० करोड ९१ लाख रुपैयाँ बराबरको ४ करोड ७७ लाख ९० हजार ८ सय ३७ कित्ता सेयर किनबेच भएको नेप्सेले जनाएको छ । कारोबार रकम ३ वर्ष यताकै उच्च हो ।

२०७८ भदौ ३ गते २० अर्ब ४० करोड रुपैयाँ सेयर कारोबार भएको थियो । सोमबार तीन वर्षअघिको कारोबार नजिक पुगेको छ ।

सबैभन्दा बढी शिवम् सिमेन्ट लिमिटेडको सेयर कारोबार भएको छ । शिवम्को प्रतिकित्ता ६ सय १६ रुपैयाँमा ६१ करोड १२ लाख रुपैयाँको सेयर किनबेच भएको छ । यस्तै कुमारी बैंकको ५५ करोड २२ लाख र नेपाल इन्भेस्टमेन्ट मेगा बैंकको ३९ करोड १८ लाख रुपैयाँको सेयर कारोबार भएको छ ।

सोमबार ७० कम्पनीको सेयर मूल्य बढ्दा १ सय ६८ कम्पनीको घटेको छ । बजार निरन्तर बढ्दै जाँदा लगानीकर्तामा विश्वास बढ्दै गएको कारोबार रकमले देखाउँछ । बैंकहरुले सस्तो ब्याजदरमा सेयर कर्जा दिएकाले पनि कर्जा लिएर सेयर लगानी गर्नेहरु बढ्दा कारोबार रकम थप वृद्धि भएको बताइएको छ ।

बजार बढ्दै जाँदा नयाँ लगानीकर्ताहरुको प्रवेश पनि भइरहेको देखिएको छ । नेपाल राष्ट्र बैंकले २० करोड रुपैयाँसम्मको संस्थागत मार्जिन सीमा हटाएपछि बजारमा सकरात्मक प्रभाव देखिएको छ । यस्तै नयाँ सरकार गठन, नयाँ अर्थमन्त्री र मौद्रिक नीति सार्वजनिक यी सबै कुराहरुले बजारमा आम लगानीकर्ताको मनोबल बढेको दैनिक कारोबार रकम र बजारको प्रवृत्तिले देखाएको छ ।

नेपाल फाइनान्स लिमिटेड, मन्दाकिनी हाइड्रोपावर लिमिटेड, बारही हाइड्रोपावरका लगानीकर्ताले कमाएका छन् । यस्तै आरम्भ चौतारी लघुवित्त, बोटलर्स नेपाल लिमिटेड र सिद्धार्थ इक्विटी फन्डका लगानीकर्ताले गुमाएका छन् ।