काठमाडौं । सत्तारुढ नेकपा (एमाले) का सचिव एवं संसदीय विभाग प्रमुख योगेशकुमार भट्टराईले कांग्रेस–एमाले सबै राजनीतिक दलहरुलाई साथमा लिएर संविधान संशोधन गर्ने पक्षमा रहेको बताएका छन् । ताप्लेजुङ सरोकार केन्द्रले शनिबार काठमाडौंमा आयोजना गरेको एक कार्यक्रममा बोल्दै उनले सो कुरा बताएका हुन् ।

सचिव भट्टराईले नेपालको राजनीतिक व्यवस्थालाई अग्रगामी दिशा दिन संविधान संशोधन गर्ने कुरालाई अघि बढाउन सोच सत्तारुढ गठबन्धनले लिएको बताए । संविधानलाई गतिशील बनाउने गरी संशोधन गर्ने सोच अघि सारिएको उल्लेख गर्दै उनले त्यसमा आवश्यक सुझाव दिन पनि विज्ञहरुलाई आग्रह गरे ।

सचिव भट्टराईले दुई ठूलो दलको सरकार बनेयता मुलुकमा सकारात्मक सन्देश गएको दावी गर्दै यसले यसले मुलुकलाई सही दिशामा अघि बढाउने दाबी समेत गरे ।

उनले भने, ‘अहिले देशका ठूलो पार्टीहरु एउटै सरकारमा बसिरहेका छौं । पक्कै पनि मुलुकका लागि केही नयाँ दिशा दिनकै लागि हामीले यो प्रयत्न गरिराखेका छौं । नेपाल देशलाई धेरै प्रयोगशाला नबनाऔं । पटकपटक प्रयोगशालाहरु हुँदै आए । अब फेरि अर्को प्रयोगशाला नबनाऔं देशलाई । यी दुई वटा पार्टी एक अर्काका प्रतिस्पर्धी पनि हुन । र, यी दुई वटा पार्टी इतिहासका निर्माता पनि हुन ।

इतिहासको कठिन मोडमा नेपाल राष्ट्रलाई सही दिशा दिन अग्रसर भएका पार्टीहरु पनि हुन । चाहे त्यो शान्ति प्रक्रियामा होस, चाहे त्यो संविधान निर्माणको बेलामा होस । चाहे अरु अन्य बेलामा होस । लोकतन्त्रलाई सुदृढीकरण गर्ने कुरामा होस । यस्ता ऐतिहासिक क्षणहरुमा हामी एक ठाउँमा आएका छौं । र, मुलुकलाई सही दिशा दिने प्रयत्न हामीले गरेका छौं । फेरी एक पटक यी दुई वटा पार्टीले यसमा पहल लिएका छन ।

मलाई विश्वास छ, हामीलाई विश्वास छ कि यसले एउटा सकारात्मक सन्देश नेपाली जनताको बीचमा गएको छ । अर्थ तन्त्रलाई लयमा फर्काउनु छ । राष्ट्रिय आत्मविश्वासलाई हामीले बढाउनु छ । विदेशी मित्रहरुको विश्वास जितेर देश भित्र लगानीको वातावरण बनाउनु छ । आजको विश्व एउटा शक्ति राष्ट्रहरुको तानातानमा हामी देखिरहेका छौं । चाहे युक्रेनमा होस्, चाहे इजरायलको गाँजा क्षेत्रमा । मध्यपूर्वमा होस ।

अनि अरु अन्य ठाउँमा होस । त्यसका बाछिटाहरु नेपाल जस्ता सानो देशले भोग्नु नपरोस । सबै विश्वका मुलुकहरुसँग हामी एउटा राम्रो सम्बन्धमा साथ उहाँहरुको सहानुभुति र सहयोग नेपालमा प्राप्त गर्नसक्ने ढंगले हामी जाऔं । दुईटा छिमेकी मुलुकहरु उत्तर र दक्षिणतिर चीन र भारत छन । उहाँहरुको समृद्धिबाट नेपाललाई कसरी फाईदा लिन सकिन्छ ? उहाँहरुका तनावबाट नेपाल कसरी मुक्त हुन्छ ? उहाँहरुको समृद्धिबाट हामीले कसरी फाईदा लिन्छौं ? यीनै विषयलाई सहज ढंगले अघि बढाउननै यी दुई वटा पार्टी एक ठाउँमा आउनु परेको हो ऐतिहासिकता हो ।

संविधानमा केही कुराहरुलाई हामीले नयाँ ढंगले हेर्नुपर्नेछ, बुझ्नुपर्नेछ । त्यसको अर्थ नेपालको राजनीतिक व्यवस्थालाई पछाडि फर्काउने होइन । नेपालको राजनीतिक व्यवस्थालाई अग्रगामी दिशा दिन संविधानमा केही अग्रगामी सोचका साथ सम्बोधन गर्नुपर्नेछ । संशोधन गर्नुपर्नेछ । यसको निम्ति नेपाली काँग्रेस र एमाले अग्रसरता लिएपनि संसदमा भएका अथवा नभएका राजनीतिक शक्तिहरु र पार्टीहरुलाई एकसाथ लिएर हामी त्यो कार्यभारलाई समेत पूरा गर्ने गरी अगाडि बढ्न सोचिरहेका छौँ ।

विद्वानहरुले संविधानका बारेमा आफ्ना सुझावहरु हामीले प्राप्त गर्ने नै छौं । त्यसले संविधानलाई अझै गतिशील बनाउन, संविधानलाई अझै राम्रो बनाउनका निम्ति सहयोग गर्नेनै छ । यीनै उद्देश्यका साथ आज हामी नयाँ सहकार्यका साथ अघि बढेका हौ । ’

सचिव भट्टराईले सरकारले मुलुकमा वाह्य लगानी भित्र्याउने गरी वैदेशिक सम्बन्धलाई अघि बढाउने विश्वास पनि व्यक्त गरे ।