काठमाडौं । लगानीकर्तालाई आकर्षक लाभांश दिँदै आएको बहुराष्ट्रिय कम्पनी सूर्य नेपाल प्रालिले यो वर्षको लाभांश सार्वजनिक गरेको छैन् । गत वर्षसम्म सेयरधनीलाई दिने लाभांश सार्वजनिक गर्दै आएको सूर्य नेपालले यो वर्षको सार्वजनिक नगरेको हो । सार्वजनिक गरेको वित्तीय विवरणमा लाभांश दिइरहेको मात्र उल्लेख गरेको छ ।

आइटिसी इन्डिया लिमिटेड, ब्रिटिस अमेरिकन कम्पनी र नेपालीको लगानीमा सूर्य नेपालको व्यापार र लगानीकर्तालाई दिने लाभांश लोभलाग्दो छ । नेपाली बजारमा एकछत्र राज गरेको सूर्य नेपालको चुरोट व्यापार बढ्दै गएको सार्वजनिक गरेको वित्तीय विवरणमा उल्लेख छ ।

यो वर्ष लाभांश सार्वजनिक नगरे पनि पाँच वर्ष अवधिमा सूर्य नेपालले लगानीकर्तालाई ४८ अर्ब ६६ करोड ६० लाख रुपैयाँ लाभांश बाँडिसकेको छ । गत वर्षसम्मलाई हेर्दा ६ वर्षको अवधिमा उद्योगले १ खर्ब ५५ अर्ब रुपैयाँको चुरोट व्यापार गरेको देखिन्छ ।

सूर्यले सेयरधनीलाई सन् २०२३ मा १० अर्ब ४३ करोड ३० लाख रुपैयाँ लाभांश दिएको छ । २०२२ मा ९ अर्ब ४१ करोड ५० लाख रुपैयाँ लाभांश दिएको थियो । यस्तै, २०२१ म ९ अर्ब ८५ करोड, २०२० मा ९ अर्ब ८५ करोड ८० लाख र २०१९ मा ९ अर्ब १३ करोड २० लाख रुपैयाँ लाभांश दिएको थियो ।

सूर्य नेपालको २०२३ मा चुरोट व्यापार ७ प्रतिशत बढेर २८ अर्ब ९९ करोड रुपैयाँ पुगेको छ । गत वर्ष सूर्य नेपालले १ अर्ब ९७ करोड ६० लाख रुपैयाँ व्यापार बढाएको सार्वजनिक गरिएको वित्तीय विवरणमा उल्लेख छ ।

यस्तै सन् २०२२ मा चुरोट कारोबार १०.२९ प्रतिशत बढेको थियो । सूर्यले एक वर्षमा २७ अर्ब १ करोड रुपैयाँको चुरोट व्यापार गरेको छ । अघिल्लो वर्ष उद्योगले २४ अर्ब ४९ करोड रुपैयाँको चुरोट व्यापार गरेको थियो ।

२०२० मा उद्योगको चुरोट व्यापार २४ अर्ब ४७ करोड रुपैयाँ थियो । यस्तै २०१९ मा २५ अर्ब १३ करोड ७० लाख र २०१८ मा २४ अर्ब २२ करोड रुपैयाँको व्यापार गरेको थियो ।

चुरोटको करमा वृद्धि भए पनि नयाँ ब्रान्ड ल्याएका कारण उद्योगको व्यापार बढेको सूर्य नेपालले जनाएको छ । चुरोटका साथै सूर्यले सलाइ र अगरबत्ती पनि उत्पादन गर्दै आएको छ ।

विदेशी लगानीकर्ताको आकर्षक गन्तव्य

नेपालमा लगानीको वातावरण छैन, जति लगानी गरे पनि राम्रो प्रतिफल प्राप्त हुँदैन भन्ने भाष्य बनेको छ । तर, लगानीको वातावरण राम्रो छैन भन्ने भाष्यलाई सूर्य नेपालको कारोबार र लाभांश वितरणले असत्य प्रमाणित गरिदिएको छ ।

नेपालमा सूर्य नेपालमात्र हैन, डाबर नेपाल प्रालि, युनिलिभर नेपाल लिमिटेड, स्ट्यान्डर्ड चाटर्ड बैंक, एनसेल आजियटा लिमिटेड, नेपाल एसबिआई बैंक, एभरेष्ट बैंक, एनएमबी बैंक र एसियन पेन्ट्सलगायत ठूला लगानीमा स्थापना भएका बहुराष्ट्रिय कम्पनीहरूको कारोबार हिस्सा ठूलो छ ।

यी कम्पनीले लगानीकर्तालाई आकर्षक प्रतिफल दिनुका साथै सहजरूपमा आफ्नो लगानी फिर्ता लैजान पाएका छन् । युनिलिभरले सेयरधनीलाई १५ सय प्रतिशतसम्म लाभांश दिएको छ ।

यस्तै एनसेलले १ सय प्रतिशतसम्म लाभांश दिएको छ । डाबर, एसियन पेन्ट्सलगायत बैंकहरुले राम्रो नाफा गरेर लगानीकर्तालाई आकर्षक प्रतिफल दिएका छन् । डाबरले उत्पादन क्षमता बढाउन लगानी थपेको छ ।

सूर्य नेपालले सूर्य लिजेन्ड, सूर्य २४ क्यारेट, सूर्य लक्जरी किङ्स, शिखर फिल्टर किङ्स, शिखर आइस रस, नौलो, खुकुरी फिल्टर, पाइलट फिल्टर, सूर्य फ्युजन, स्टिकर स्पाइस रस, बिजुली र चौतारी ब्रान्डका चुरोट उत्पादन गरिरहेको छ ।

जनकपुर चुरोट कारखाना अवसानपछि चुरोट बजारमा सूर्य नेपालको एकछत्र राज छ । सूर्य नेपाल सबैभन्दा बढी कर तिर्ने उद्योगमा पर्दै आएको छ । सरकारले उद्योगलाई वर्षेनि सम्मान गर्दै आएको छ ।

सन १९८६ मा स्थापना भएको सूर्यमा आइटिसी इन्डिया लिमिटेडको ५९ प्रतिशत सेयर छ । ३९ प्रतिशत नेपालीहरु लगानी स्वामित्व रहेको छ । यस्तै, दुई प्रतिशत ब्रिटिस अमेरिका टोबाको लिमिटेडको छ ।

फरच्युन रिसोर्ट सञ्चालन, पाँचतारे होटल खोल्ने तयारी

कम्पनीको व्यवसायलाई विविधीकरण गर्न व्यवस्थापनले होटल व्यवसायमा प्रवेश गर्ने योजना बनाएको छ । होटल व्यवसायमा प्रवेशको तयारी गर्ने भनेको लामो समय बितिसकेको छ । तर, सुरु भएको छैन । माउ कम्पनी भारतको आइटिसी लिमिटेडले नेपालमा होटल खोल्ने बताउँदै आएको छ । आइटिसी र नेपाली व्यवसायी कमल जैनको संयुक्त लगानीमा १ अर्ब रुपैयाँ लगानीमा साँगामा फच्र्युन वेलनेस रिसोर्ट सञ्चालनमा आएको छ ।

उद्योगले ५ अर्ब ७५ करोड रुपैयाँ ऋणको रेटिङ गराएको छ । तर, होटल निर्माण सुरु भएको छैन ।

सूर्य नेपालले काठमाडौं बूढानीलकण्ठमा होटल बनाउने भएको हो । होटलको आर्किटेक्चरल डिजाइन तयार भइसकेको छ । उद्योग विभागले ५ अर्ब ९९ करोड रुपैयाँ होटलमा लगानीका लागि स्वीकृत गरिसकेको छ ।

आइटिसीको ७ खर्ब भारु आम्दानी

माउ कम्पनी आइटिसी होटल्सले अन्तर्राष्ट्रिय होटल चेनसँग आइटिसी ग्राण्ड भारत, आइटिसी मौर्य, आइटिसी रोयल बंगाल ब्रान्ड नाममा भारतमा मात्र एक दर्जन प्रिमियम होटल तथा रिसोर्ट सञ्चालन गरिरहेको छ । आइटिसी सन् १९१० मा स्थापना भएको थियो ।

कम्पनीले भारतमा चुरोट उत्पादनसाथै प्याकेजिङ फुड, स्टेसनरी, सलाइ, अगरबत्ती, होटल, एग्रो बिजनेसमा संलग्न छ । कम्पनीको अध्यक्षमा सञ्जीव पूरी छन् । उनी आइटिसी इन्डियाको अध्यक्ष तथा प्रबन्ध निर्देशक पनि हुन् ।

एक वर्षमा आइटिसीले ६ खर्ब ९४ अर्ब ४६ करोड रुपैयाँ व्यापार गरेको छ । आइटिसीको बजार पुँजीकरण बढेर ५३ खर्ब ४७ अर्ब ८३ करोड रुपैयाँ पुगेको सूर्य नेपालले जनाएको छ ।

यो पनि : 

बहुराष्ट्रिय कम्पनी सूर्य नेपालको चुरोट व्यापार बढ्दो, एक वर्षमा गर्यो २९ अर्ब कारोबार