सिप्रदी ट्रेडिङ प्रालि नेपालमा भारतको टाटा गाडी ल्याएर बेच्ने पुरानो कम्पनी हो । सिप्रदीले ४२ वर्षदेखि नेपालमा टाटा गाडी बिक्री गर्दै आएको छ । नेपालमा एकछत्र राज गरेको सिप्रदीले पछिल्लो समयमा बजारका मागअनुसार इभी गाडी पनि ल्याउन थालेको छ । कम्पनीले टाटाका पाँचवटा इभी ब्राण्ड नेपाली बजारमा ल्याइसकेको छ । यि सबै इभी गाडी ग्राहकको रोजाइमा परेका छन् । आउँदो अटो शोलाई लक्षित गर्दै सिप्रदीले मिडसाइज एसयुभी पन्च इभी सार्वजनिक गर्दै छ । नेपालको अटो बजारको अवस्था र भावी योजनाबारे केन्द्रीत रहेर सिप्रदीका सेल्स एन्ड मार्केटिङका जनरल म्यानेजर सावन्तजंग सिजापतीसँग सुनौलो नेपालले गरेको अटो सम्वाद  :

गाडीहरुको कुम्भ मेला भनेर चिनिने नाडा अटो शो आयोजना हुँदै छ । यसपाली सिप्रदी अटो शोको ‘टाइटल स्पोन्सर’ पनि बनेको छ । नयाँ इलेक्ट्रिक गाडी (इभी) लन्चको तयारी कस्तो छ ?

यसपालीको अटो शोमा दुई वटा नयाँ इभी गाडी सार्वजनिक गर्ने तयारीमा छौं । गत वर्षको नाडा अटो शोमा टियागो इभी गाडी सार्वजनिक गरेका थियौं । यो गाडी धेरैले रुचाइदिनु भयो । यसपाली पनि यसलाई अटो शोको डिस्प्लेमा राख्ने छौं । अर्को नेपालको अटो बजारमा बहुप्रतिक्षित टाटा पन्च जसलाई धेरैले कुरिरहनु भएको छ । यसलाई अटो शोमा लञ्च गर्ने भएका छौं ।

टाटा पन्चको मुलुकभरी परीक्षण भइरहेको छ । अटो शोमा पन्चको मूल्य, फिचर र प्रोडक्टलाई शोकेस गर्ने छौं । पन्चको प्रिबुकिङ सुरु भइसकेको छ । अगस्टको १२ तारिखदेखि प्रिबुकिङ सुरु गरिसकेका छौं । औपचारिक सार्वजनिक भने नाडा अटो शोमा गर्ने छौं ।

अन्य इभी भन्दा पन्चमा फरक फिचर्स के छ ?

पन्च मिड साइज कम्प्याक्ट एसयूभी गाडी हो । बिग सनरुफ भएको एसयूभी गाडी चाहिएको छ । त्यसलाई क्याटर गर्न हामीले पञ्च इभी ल्याएका हौं । पन्च साना ह्याचब्याग एसयूभी भन्दा एक तह माथिको गाडी हो । टाटाले प्योर इभी प्लाटफर्मममा बनाएको गाडी हो । यसको प्राविधिक हिसावले अन्य गाडीसँग प्रतिस्पर्धा गर्न सक्ने छ । सबैभन्दा महत्वपूर्ण कुरा ग्राहकले पन्च किन्दा तपाईंले के पाउनु हुन्छ ? भन्ने प्रश्नमा हामी भन्छौं पन्च किन्दा सिप्रदी पाउनु हुनेछ ।

सिप्रदीले ४२ वर्षदेखि नेपाली बजारमा टाटा मोटरका विभिन्न ब्राण्डका गाडी बिक्री वितरण गर्दै आएको छ । सिप्रदी नेपालको टाटा गाडीको मार्केट लिडरको रुपमा काम गरिरहेको छ । मुलुकभरी यसको ठूलो सञ्जाल छ । स्पेयर पार्टस, सर्भिसिङ र चार्जिङका लागि सबैभन्दा ठूला नेटवर्क बनाउन सफल भइसकेको छ ।

ब्याट्री प्रविधिका साथै इभीमा नयाँ एउटा फिर्चर अडास आइरहेको छ । सो फिचर्सयुक्त गाडी पन्च हो । नेपालको इभी सेग्मेन्टमा बहुचर्चित गाडी नेक्सन हो । पन्च इभी यो भन्दा सानो र टियागो भन्दा माथिको हो । टियागो र नेक्सनका बीचमा जुन ग्याप थियो त्यसको पूर्ति पन्चले गरेको छ । मूल्य टियागो भन्दा माथि र नेक्सन भन्दा कम बीचको रेन्जमा हुन्छ ।

यि दुई बाहेक अटो शोमा अरु कुन इभीलाई फोकस गर्दै हुनुहुन्छ ?

हामीले मुख्य फोकस गरेको यी दुईटा गाडी हो । अहिले नेपाली अटो बजार इभीमा सिफ्ट भइसकेको छ । त्यसैले गर्दा यो अटो शोमा दुईटा इभी गाडी सार्वजनिक गर्ने सोच बनाएका छौं ।

आउदो अटो शोमा धेरै इभी गाडी बुकिङ हुने संभावना देखिएको छ । यसमा टाटाको अवस्था के रहनेछ ?

बुकिङ अहिले पनि भइरहेको छ । अटो शोमा गाडी हेरिसकेपछि ग्राहकलाई बुकिङ गर्न उत्साह थपिन्छ । लिने निश्चित गर्नुभएका ग्राहकले अहिलेदेखि नै बुक गरिरहनु भएको छ । अटो शोमा आएर अन्य कम्पनीका गाडीसँग तुलना गरेर फिचर्स हेरौं , परिवारसँग सल्लाह गरौं, अन्य इभी गाडीसँग तुलना गरौं र टेस्ट ड्राइभ गरौं भन्ने ग्राहक अटो शोमा आउनु हुन्छ ।

पन्च इभी जुन सेग्मेन्ट र प्राइस रेन्जमा आउँदै छ । मिडसाइज इभीको संभावना उच्च भएकाले यो वर्षको अटो शोमा गत वर्षको भन्दा राम्रो हुने देखिएको छ । गत वर्ष हामीले टियागो लन्च गरेका थियौं । यसमा राम्रो गरेका थियौं । यसपालीको पन्चले त्यो भन्दा राम्रो गर्नेछ । यसका लागि हामी तयार छौं । सबै तयारी पुरा भइसकेको छ । अर्को साता गाडी लन्च गर्ने छौं ।

अहिलेसम्म कतिवटा पन्च इभी ल्याइसक्नु भएको छ ?

हामीले दुईटा पन्च इभी ल्याएर पूर्वदेखि पश्चिमसम्म टेस्ट ड्राइभ गरिसकेका छौं । यो बाहेक बुक गरेका ग्राहकलाई दिन पहिलो लटको पन्च आइसकेको छ ।

बुक गरेको कति दिनमा गाडी दिनुहुन्छ ?

कति दिनमा भन्दा पनि ग्राहकले जति छिटो कागजातको काम सक्नु हुन्छ त्यति नै चाँडो गाडी दिने छौं । झण्डै ९० प्रतिशत गाडी खरिदबिक्री बैंकबाट हुने गरेको छ । बुक गरिसकेपछि पैसाका लागि बैंकको प्रक्रिया पुरा गर्नुपर्छ । बैंकले ऋण स्वीकृत भयो दिनु भनेर पत्र दिएपछि तत्काल गाडी दिन सक्छौं । प्लानिङ र प्रोसेसिङमा सिप्रदी सधैं अगाडी छ ।

सिप्रदीको फोकस अब इभी गाडीमा हो ?

त्यस्तो हैन । हामी व्यापारिक कम्पनी भएकाले बजारको मागअनुसारको गाडी ल्याउनुपर्छ । आजको दिनमा बजारको सेन्टिमेन्ट विस्तारै इभीतिर गएको देखिएको छ । त्यसैले हाम्रो फोकस र कन्र्सरटेसन पनि अली बढी इभी गाडीमा छ । हामीले स्रोत पनि सोहीअनुसार इभीमा व्यवस्थापन गरेका छौं । सिप्रदी आफै ठूलो संस्था भएकाले राम्रो रिसोर्स छ । पेट्रोल डिजेलबाट चल्ने इन्टरनल कम्बस्टन इन्जिन ( आइसिइ) गाडीलाई हामी पुरै छाड्दैनौं र छोड्न पनि हुन्न ।

आइसिइको पनि नेपालमा बजार राम्रो छ । हो, पछिल्ला समय आइसिइको बजार घट्दो क्रममा छ । त्यो भन्दै गर्दा राम्रो बजार आइसिइको भएकाले हामीले यसमा फोकस घटाएका छैनौं । आइसिइमा छुट्टै जनशक्ति भएकाले यसलाई हामीले अझ सशक्त रुपमा अघि बढाउँदै छौं ।

अटो शो इभी गाडीमा फोकस भएकाले बढी जोड दिएका छौं । आइसिइका लागि पनि नयाँ प्रोडक्ट छ । जे प्रोडक्ट इभीमा छ, आइसिइमा पनि त्यस्तै नयाँ गाडी हामीसँग उपलब्ध छ ।ग्राहकको रुचीअनुसार हामीसँग इभीदेखि आइसिइका विभिन्न भेरियन्टका गाडी उपलब्ध छ । ग्राहकलाई छान्ने अवसर सिप्रदीमा छ ।

आइसिइमा अग्रणी कम्पनी सिप्रदी अन्य प्रतिस्पर्धीको तुलनामा पछि परेको देखियो, किन होला ?

त्यसरी हेर्न मिल्दैन । हाम्रो बिजनेस वर्ष अप्रिलबाट सुरु भएर मार्चमा सकिन्छ । जुन वर्ष हामीले पहिलो पटक नेक्सन इभी भित्र्यायौं, त्यो वर्ष सबैभन्दा बढी बिक्री हुने गाडी नेक्सन इभी भएको छ । बिक्रीका हिसावले हामी पहिलो नम्बर भयौं । दोस्रो वर्ष टियागो पनि ल्यायौं । यसमा पनि हामीले ठूलो सफलता पायौं । हामीसँग नेक्सन इभी, टियागो र टिगोर पनि छ । टियागो ल्याएको वर्ष पनि हामी पहिलो नम्बर नै भयौं ।

अहिले हामी इभीको तेस्रो वर्षमा छौं । तेस्रो वर्षको पनि भर्खरै अगस्टमा छौं । अगस्टसम्म आइपुग्दा हामीले नयाँ गाडी ल्याएका थिएनौं । पन्च इभी अटो शोमा लन्च गरिसकेपछि पनि पहिलो स्थानमा हुनेछौं । त्यो बाहेक दोस्रो हुने अप्सन सिप्रदीलाई छैन् । सिप्रदीले गाडी बिजनेस पहिलो स्थानमा बसेर गरिरहेको छ । आगामी दिनमा पनि पहिलो नै हुनेछ । विगतमा कमर्शियल भेहिकलमा सिप्रदी पहिलो नम्बरको कम्पनी हो ।

इभीमा पनि पहिलो नम्बरमा नै छौं । अब पन्च आएपछि इभीमा हाम्रो पोजिसन झनै बलियो हुनेछ । हामीसँग टियागो, टिगोर, नेक्सन र पन्च इभी हुनेछ । त्यो बाहेक हामीसँग ट्याक्सी बिजनेसका लागि एक्सप्रेस टी भन्ने छुट्टै इभी गाडी पनि बजारमा छ । हामीसँग अहिले पाँचवटा मोडलका इभी छन् ।

एक्सप्रेस टी ट्याक्सी बिजनेसका लागि मात्र हो ?

एक्सप्रेस इभीको फोकस ट्याक्सीका लागि मात्र हो । यसलाई प्राइभेट नम्बर प्लेटमा बेचेका छैनौं । ट्याक्सी बिजनेसमा आएपछि रातो नम्बर प्लेट राखेर चलाउनलाई सोच्नुपर्छ । त्यसैले व्यक्तिगत प्रयोजनका लागि बेच्दैनौं । गाडी राम्रो छ । एक्सप्रेस किन्नेले राम्रो प्रतिफल पाउनु भएको छ ।

एक्सप्रेस काठमाडौं उपत्यकाका लागि मात्र हो । इभी ट्याक्सीका लागि बालकुमारीमा एक्सक्लुसिभ वर्कसप सञ्चालनमा आइसकेको छ । त्यो बाहेक हामी यो साता राजधानीको अर्को ठाउँमा इभी ट्याक्सीका लागि नयाँ वर्कसप तयार गरिसकेका छौं । सिप्रदीले राजधानीका दुई स्थानबाट वर्कसप सेवा दिनेछ । पूर्वाधार तयार भइसकेकाले फूल सर्भिस दिनेछौं ।

टाटा मोटर्सले साना इभी गाडी त बनाइसकेको छ । बस र ट्रक जस्ता ठूला इभी गाडी बनाउने तयारी गरेको छ ?

यसको संभावना देखिएको छ । विस्तारै प्रविधि विकास हुँदै जाँदा ठूला इभी गाडी बन्ने देखिएको छ । कति चाँडो र ढिलो भन्ने कुरा हो । टाटा भारत र नेपाल दुबै मुलुकमा पहिलो नम्बरमा छ । अनुसन्धान तथा विकास टिम (आर एन्ड डी) सशक्त छ । ठूला गाडी पनि इभीमा जाने तयारी टाटाले गरिसकेको छ । केही तहमा केही कुरा भएको छ । बजार तयार भएपछि आउनेछ ।

केही वर्षभित्र काठमाडौंलगायतका अन्य सहर इभी गाडीमय बन्ने अवस्था देखिएको हो ?

हो, यो राम्रो कुरा हो । यसको अगुवा सिप्रदी नै हुनेछ । मासमा जाने पहिलो कम्पनी सिप्रदी नै हो । २०२१ को जुलाइमा नेक्सन इभी लन्च गर्नुअघि पूर्वाधारमा ठूलो लगानी गरिसकेका थियौं । इभी गाडी आउनुअघि १४ वटा वर्कसप र १५ वटा चार्जिङ स्टेशन तयार भइसकेको थियो । आजको दिनमा बढाएर चार्जिङ स्टेशन २६ र वर्कसप १७ वटा पुगिसकेको छ । तयारी र पूर्वाधारमा लगानीको कुरा गर्दा सिप्रदी सबैभन्दा अगाडी छ ।

सिप्रदीले टाटाको पाँचवटा इभी ब्रान्ड ल्याइसकेको छ । चार्जिङ स्टेशन अहिले मुख्य समस्या देखिएको छ । यस विषयमा सिप्रदीले के सोचेको छ ?

अहिलेसम्म हामीले सिटी इभी कार मात्र बेचिरहेका छौं । हाइवेमा लिएर जान पनि सकिन्छ । ९० प्रतिशत बढी सिटी एरियामा चल्ने गरेको छ । पोखरा, काठमाडौं र नारायणघाटलगायत अन्य शहरी क्षेत्रमा किन्दा त्यहीभित्र मात्र चल्ने गरेको छ । उहाँहरुले एसी चार्ज राखेर आफ्नै घरमा गाडी चार्ज गर्नुहुन्छ । कहिलेकाही हाइवेमा इभी लिएर यात्रा गर्नुहुन्छ । हामीले हरेक १०० किलोमिटरको दुरीमा चार्जिङ स्टेशन राख्ने योजना बनाएका थियौं ।

अहिले बढाएर हरेक ७५ किलोमिटर दुरीमा राख्न लागेका छौं । यसको दोस्रो चरणमा छौं । तेस्रो चरणमा पुग्दा हरेक ७५ किलोमिटरबाट ५० मा चार्जिङ स्टेशन राख्ने छौं । गाडीको बिक्री र त्यसपछि ग्राहकरुलाई दिने सेवा सुविधाका लागि आवश्यक पूर्वाधार एकसाथ अघि बढाइरहेका छौं । आजको दिनमा २६ वटा चार्जिङ स्टेशन राखिसकेका छौं भने नेपाल विद्युत प्राधिकरणले पनि ५२ वटा जडान गरिसकेको छ । हामीले स्टेशन कहाँ राख्दा राम्रो हुन्छ भनेर ग्राहकसँग फिडव्याक लिइरहेका छौं ।

आइसिइमा एकछत्र राज गरेको टाटालाई इभीमा ठूलो थ्रेट देखिएको छ, यहाँ के भन्नुहुन्छ ?

कुन बिजनेसमा कसलाई थ्रेट छैन र ? हामी यसलाई चुनौतीको रुपमा लिन्छौं । हो बजारमा ठूलो चुनौती छ । तर यसलाई अवसरका रुपमा लिएका छौं । हाम्रो संभावनाले अवसर प्राप्त गर्न जुन जुन चुनौती लिनुपर्ने हो त्यसलाई हामीले लिइरहेका छौं । लिन हामी तयार छौं । चुनौतिपूर्ण बजारमा राम्रो बिजनेस अवसरहरु हुन्छन् । सिप्रदीले नेपालमा टाटालाई पहिलो नम्बरको बनाउन सफल भएको छ । भारतको तुलनमा नेपालको बजारमा बढी प्रतिस्पर्धा छ ।

भारतमा थोरै प्लेयर छन् भने नेपालमा धेरै छन् । भारतमा नभएको गाडी नेपालमा आएको छ । भारतमा नपाउने प्रोडक्ट नेपालमा पाउने गरेको छ । जस्तै ९० को दशकमा काठमाडौंमा ट्याक्सी भनेको टोयोटा कोरोला थियो । त्यसबेला भारतमा टोयटा गाडी आएको थिएन् । त्यसबेलादेखि नै नेपालमा टोयटा गाडी आएको थियो जुनबेला भारतमा थिएन् । यस्तो बजारमा सिप्रदीले टाटालाई पहिलो बनाएको छ ।

गाडीको मूल्यमा कतिको प्रतिस्पर्धा देखिएको छ ?

मूल्यमा प्रतिस्पर्धा हुनु ग्राहकका लागि राम्रो कुरा हो । मूल्य जहिले पनि प्रतिस्पर्धी हुनुपर्छ । कसैले पनि अनायस लाभ लिन पाउनु हुँदैन । मूल्य हाम्रा लागि चुनौती छ । ग्राहकलाई सस्तो मूल्यमा राम्रो प्रोडक्ट ल्याउन सिप्रदीलाई चुनौती पनि छ । प्रोडक्ट लिएपछि गाडीको यात्रालाई एकदम राम्रो बनाउन लगानी गर्नुपर्ने हुन्छ । चाहे त्यो वर्कसप, स्पेयरपार्टस वा इभी वर्कसप र चार्जिङमा होस ।

हामीले गरिरहेका छौं । सिप्रदीले बालकुमारीमा ब्याट्रीको डाइगोनस्टिक एन्ड रिपियर सेन्टर बनाएको छ । हाम्रो आफ्नो इनहाउस सेन्टर खोलेका छौं । टाटा मोटरका सबै प्रकारका गाडीमा ब्याट्रीको समस्या समाधान गर्छौ । टाटाको हरेक मर्मत सम्भारमा हाम्रो जनशक्ति काबिल भइसकेको छ । बाहिरबाट ल्याउनु पर्दैन । यस्तै नैकापमा तालिम केन्द्र पनि छ ।

टाटामा कार्यरत कर्मचारी मात्र नभएर नेपाल प्रहरीलगायत सबैलाई निःशुल्क प्राविधिक तालिम दिइरहेका छौं । प्याकेज लिएर बजारमा गइरहेकाले हामी सधै नम्बर वान पोजिसनमा छौं । सिप्रदीसँग आवद्ध भएपछि ग्राहकहरुले हरेक यात्रामा देखिएका समस्याको समाधान दिने कम्पनीको नीति नै हो ।

पछिल्लो समय इभी गाडीमा किलोवाटको कुरा उठेको छ । टाटामा त्यस्तो समस्या छ कि छैन ?

हाम्रो स्ट्यान्डर्ड र सरकारले तोकेको नीति नियमभित्र बसेर काम गर्छौ । त्यहाँ भन्दा बाहिर जाने फिलोसपी छैन् । यस विषयमा प्रतिक्रिया दिने उपयुक्त व्यक्ति म हैन । समाचार पढिरहेको छु । यस विषयमा केही होला । किलोवाट परीक्षण गर्ने प्रविधि नेपालमा छैन् । यसमा लगानी चाहिन्छ । सरकारले ल्याएर क्षमता परीक्षण गर्नुपर्छ । भारतको अटोमोटिभ रिसर्च एजेन्सी अफ इन्डिया संस्थानबाट परीक्षण गरेर सर्टिफाइड भएपछि मात्र नेपालमा टाटा गाडी भित्रिन्छ । सरकारको मापदण्ड हामीले पुरा गरेका छौं ।