काठमाडौं । साधारण सेयर (आइपिओ) निष्कासनको तयारीमा रहेको कान्तिपुर टेलिभिजन नेटवर्क लिमिटेडको आम्दानी ३६ प्रतिशत घटेको छ । गत वर्ष कान्तिपुर टेलिभिजनले २७ करोड ७० लाख रुपैयाँ व्यापार गरेको छ ।

अघिल्लो वर्ष टेलिभिजनको व्यापार ३७ करोड ७० लाख रुपैयाँ थियो । एक वर्षमा कान्तिपुर टेलिभिजनको व्यापार १० करोड रुपैयाँ घटेको सार्वजनिक गरेको वित्तीय विवरणमा उल्लेख छ ।

२०२२ मा कान्तिपुर टेलिभिजनको व्यापार ३२ करोड ४० लाख रुपैयाँ थियो । २०२० मा ३१ करोड २० लाख र २०१९ मा ३७ करोड ५० लाख रुपैयाँको व्यापार गरेको थियो । आर्थिक गतिविधि सुस्त हुँदा बिज्ञापनबाट हुने आम्दानीमा कमी आएको सार्वजनिक भएको वित्तीय विवरणमा उल्लेख छ ।

आम्दानी कम भएपछि कान्तिपुर टेलिभिजनको मार्जिन पनि घटेर ९.१७ प्रतिशतमा झरेको छ । २०२२ मा टेलिभिजनको मार्जिन ३५.६८ प्रतिशत थियो । यसबीचमा टेलिभिजनको ऋण घटेको छ । टेलिभिजनले ६७ करोड ४४ लाख रुपैयाँ ऋण रहेको छ । यसअघि कम्पनीको ऋण ९१ करोड ७० लाख रुपैयाँ थियो ।

जसमध्ये ६२ करोड ४४ लाख रुपैयाँ दीर्घकालिन र ५ करोड रुपैयाँ अल्पकालिन ऋणको रेटिङ गराएको छ । कान्तिपुर टेलिभिजन नेपालको अगुवा टिभी च्यानल हो । कान्तिपुर मिडिया ग्रुपअन्तर्गत कान्तिपुर दैनिक, दि काठमाण्डु पोष्ट र कान्तिपुर रेडियो सञ्चालनमा सन् । सन २००० मा स्थापना भएको टेलिभिजन सन २००३ देखि सञ्चालनमा आएको हो ।

आइपिओ निष्कासन गर्न कान्तिपुर टेलिभिजन २०२१ को जुलाइमा कम्पनी पब्लिक लिमिटेडमा परिणत भएको छ । आइपिओ निष्कासन गर्न कम्पनीले नेपाल धितोपत्र बोर्डमा निवेदन दिएको छ । कम्पनीले साढे ७ करोड रुपैयाँ बराबर साढे ७ लाख कित्ता आइपिओ निष्कासन गर्न लागेको हो ।

कान्तिपुर टेलिभिजनको अध्यक्ष तथा प्रवन्ध निर्देशकमा कैलाश सिरोहिया छन् । यस्तै सञ्चालकमा उपेन्द्र महतो र जीवा लामिछाने रहेका छन् । कम्पनीले कान्तिपुर टेलिभिजन एचडी र कान्तिपुर सिनेप्लेक्स एचडी सञ्चालन गर्दै आएको छ ।