काठमाडौं । किर्ते मुद्दामा पक्राउ परेका लुम्बिनीका प्रदेश सभा सदस्य धनबहादुर केसी कारागार नबसी सोमबार रिहाइ भएका छन् । ३३ वर्ष पुरानो मुद्दामा दोषी ठहर भइ उनलाई अदालतले जेल चलानको आदेश गरेको थियो ।

फौजदारी अपराधसंहिता २०७४ मा भएको व्यवस्थाअनुसार उनी रकम जम्मा गरेर छुटेका छन् । फौजदारी अपराधसंहितामा एक वर्षसम्म कैद सजाय तोकिएका व्यक्तिले रकम जम्मा गरे जेल सजाय भोग्नु नपर्ने प्रावधान छ । सो व्यवस्थाअनुसार केसी १ लाख ९ हजार २ सय रुपैयाँ बुझाएर रिहा भएका हुन् । अदालतबाट दोषी ठहर भएका केसीलाई आइतबार नै कारागार चलान गर्न भनिएको थियो ।

रुकुम पूर्वबाट निर्वाचित कांग्रेस सांसद केसी कागजात किर्ते मुद्दामा दोषी ठहर भएका थिए । कैद सजाय पूरा नगरेका उनी रुकुम पूर्व जिल्ला अदालतमा आइतबार उपस्थित भएका थिए । जिल्ला अदालतका निमित्त श्रेस्तेदार राधाकृष्ण रिजालले न्यायाधीश लोकबहादुर हमालको इजलासले प्रदेश सभा सदस्य केसीलाई रकम लिएर रिहाइको आदेश दिएको बताए ।

केसीले श्रीमतीसँगको अंश मुद्दामा किर्ते गरेको अभियोगमा साविक रुकुम जिल्ला अदालतले उनलाई ०४८ साल असार ९ गते दोषी ठहर गरेको थियो । एक वर्ष जेल सजाय र २ हजार जरिवाना तोकिएका सांसद केसीले आइतबार रुकुम पूर्व जिल्ला अदालतमा उपस्थित भएका थिए ।

यो पनि :

लुम्बिनीका प्रदेश सांसद केसी जेल चलान, पदबाट निलम्बन हुने