काठमाडौं । पारा ओलम्पिकमा कास्य पदक जितेकी पलेशा गोवर्धनलाई बीवाइडीको नेपालको आधिकारिक बिक्रेता साइमेक्स इंकले डल्फिन गाडी दिएको छ । कम्पनीले विहीबार एक कार्यक्रमकाबीच ४१ लाख मूल्य बराबरको डल्फिन गाडी दिएको हो ।

कम्पनीले विद्युतीय सवारी साधनमा एग्रेसिभ बजार विस्तार गरिरहेको छ ।

गोवर्धन पारा ओलम्पिकमा कास्य पदक जित्ने पहिलो नेपाली खेलाडी हुन् । साइमेक्स इंककी प्रवन्ध निर्देशक यमुना श्रेष्ठले गाडी हस्तान्तरण गरेकी थिईन् । उनले नेपाललाई विश्वमा चिनाउन महत्वपूर्ण भूमिका खेलेको पलेशालाई सम्मान गर्न पाउँदा गर्व महशुस भएको बताइन् ।

त्यस्तै, उक्त सम्मान कार्यक्रमा बोल्दै कम्पनीका अध्यक्ष अनिल श्रेष्ठले नाफा मात्रै नभएर सामाजिक दायित्व वहनलाई पनि आफ्नो कम्पनीले उच्च प्राथमिकता राखेको बताए । साइमेक्स इंकले दुई साताअघि एक करोड रुपैयाँ राखेर साइमेक्स बीवाइडी च्यारिटी फाउण्डेसन सुरु गरिसकेको छ ।

कम्पनीका प्रमुख कार्यकारी अधिकृत साहिल श्रेष्ठले खेलमार्फत विश्वमा नेपालको गरिमा उच्च बनाउन भूमिका खेल्ने पलेशालाई सम्मान गर्न पाउँदा खुशी लागेको बताए । गोवर्धनले आफ्नो सफलताले खेलाडीहरूलाई प्रेरित गर्ने बताउँदै सम्मानका लागि कम्पनीलाई धन्यवाद दिईन् ।