काठमाडौं । सिटिजन्स बैंकले सेयरधनीलाई ४.२१ प्रतिशत लाभांश दिने प्रस्ताव गरेको छ । बैंकको सोमबार अपरान्ह बसेको ४ सय ६३औं सञ्चालक समितिको बैंठकले उक्त लाभांश प्रस्ताव गरेको हो।

सञ्चालक समितिले गत आर्थिक वर्ष २०८० ८१ को वितरणयोग्य नाफाबाट चुक्ता पुँजीको ४ प्रतिशत बोनस सेयर र ०.२१ प्रतिशत कर प्रयोजनका लागि नगद लाभांश प्रस्ताव गरेको छ। बैंकले ५६ करोड ३८ लाख रुपैयाँ बोनस सेयर वितरणको प्रस्ताव गरेको छ ।

नेपाल राष्ट्र बैंकको स्वीकृति र त्यसपछि बैंकको वार्षिक साधारणसभाबाट पारित भएपछि सेयरधनीमा वितरण हुनेछ। हाल बैंकको अहिले चुक्ता पुँजी १४ अर्ब २० करोड ९ लाख रुपैयाँ छ। बोनस सेयर वितरणपछि बैंकको चुक्ता पुँजी बढ्ने छ ।

सिटिजन्सले २०६४ वैशाख ७ गतेबाट बैंकिङ कारोबार थालेको हो । १८ वर्षदेखि वित्तीय सेवा प्रदान गर्दै आइरहेको सिटिजन्सले सर्वसाधारणलाई सेयर जारी गरेको आर्थिक वर्ष २०६५/६६ देखि सेयरधनीहरुलाई निरन्तर लाभांश वितरण गर्दै आइरहेको छ । आर्थिक वर्ष २०६५/६६ देखि गत आर्थिक वर्ष २०८०/८१ सम्मको औसत लाभांश दर ११.५६ प्रतिशत रहेको छ । प्रस्तावितसहित पछिल्लो १० वर्षको औसत लाभांश दर १२.१० प्रतिशत रहेको बैंकले जनाएको छ ।

सिटिजन्स बैंकले देशैभरी ६० जिल्लामा फैलिएका आफ्ना १ सय ९७ वटा शाखा, १ सय ६२ एटिएम, ३ वटा विस्तारित काउन्टर र ७४ वटा शाखा रहित बैंकिङ ईकाइहरुबाट १८ लाख ग्राहकलाई आधुनिक बैंकिङ सेवाहरु प्रदान गर्दै आएको छ ।

यो पनि :

सिटिजन्स बैंकको खुदनाफा १ अर्ब ३४ करोड, लाभांश दिने क्षमता ४.३४ प्रतिशत