काठमाडौं । पर्यटकीय गन्तव्य धुलिखेलको नमोबुद्धमा रहेको पाँचतारे स्तरको दुसित थानी हिमालयन रिसोर्टको बाँकी काम २०२४ भित्र सकिने भएको छ । रिसोर्टको ५४ कोठा र १८ वटा भिल्ला सन् २०२४ मा आउने अपेक्षा गरिएको लगानीकर्ता ओम्स्टोन एसिया क्यापिटलले जनाएको छ ।

रिसोर्ट २०२३ जुलाइदेखि २८ कोठा र १८ लिज भिल्ला सञ्चालमा आएको हो । अहिले रिसोर्टको पूर्वाधार विस्तारको काम भइरहेको छ ।
थाइल्यान्डको हस्पिटालिटी ग्रुप ‘दुसित थानी हिमालय रिसोर्ट’ ब्रान्डमा व्यवस्थापन तथा सञ्चालनमा छ । सञ्चालनमा आएको एक वर्षमा रिसोर्ट १२ करोड रुपैयाँ व्यापार गरेको सार्वजनिक भएको वित्तीय विवरणमा उल्लेख छ ।

रिसोर्टको लगानीकर्ता ओम्स्टोन एसिया क्यापिटलले १ अर्ब ५७ करोड ९२ लाख रुपैयाँ बैंक ऋण रेटिङ गरेको छ । कम्पनीले ६९ करोड स्वपुँजी (इक्विटी) लगाएको छ । जसमा ६३ प्रतिशत बैंक ऋण र ३७ प्रतिशत इक्विटी हो । यसअघि १ अर्ब ४ करोड रुपैयाँ ऋण लगानी हुने अनुमान गरिएको थियो ।

रिसोर्टमा ८५ प्रतिशत दुसित इन्टरनेसनलको लगानी र १५ प्रतिशत ओमस्टोन एसियाको लगानी छ । ओम्स्टोनका प्रमुख लगानीकर्ता भारतीय मुलका विष्णु मोर हुन् । युनाइटेड अरब इमिरेट्स (युएई) बसेर व्यवसाय गरिरहेका मोरको भारतको पाम तेल उद्योगमा ठूलो लगानी छ ।

धुलिखेलमा रिसोर्ट निर्माण गर्न मोरले नेपाल धितोपत्र बोर्डका पूर्व अध्यक्ष रमेश हमाललाई साझेदार बनाएका छन् । हमाल नेपाली आतिथ्य सत्कार उद्योगसहित दक्षिण–पूर्वी एसिया र क्यारेबियन क्षेत्रका होटलमा काम गरेका अनुभवी व्यवसायी हुन् । बौद्ध तीर्थस्थल नमोबुद्ध नजिक रहेको रिसोर्ट काठमाडौंबाट करिब डेढ घण्टाको दूरीमा छ ।

रिसोर्टको व्यवस्थापन हेर्न ओएसिपिएलले दुसित थानीसँग १० वर्षको सम्झौता गरेको छ । यो सम्झौता अर्काे १० वर्षका लागि पनि नवीकरण हुने समझदारी दुईबीच छ ।

बढी पैसा खर्च गर्न गुणस्तरीय पर्यटक लक्ष्य गरी २०१८ बाट रिसोर्ट निर्माण सुरु भएको हो । २०२१ जुलाईमा रिसोर्ट सञ्चालनमा आउने गरी परियोजना सुरु भए पनि कोरोना महामारी र रिसोर्टको डिजाइन परिवर्तन भएका कारण पछाडि धेकेलिएको थियो ।

रिसोर्टमा ५४ कोठा र १८ भिल्ला रहने छन् । होटलको लागत बढेर प्रतिकोठा ४ करोड ३० लाख रुपैयाँ पुगेको रिसोर्टको विकासकर्ता ओम्स्टोन एसियाले जनाएको छ । रिसोर्ट परियोजना घोषणा हुँदा प्रतिकोठा लागत २ करोड ६० लाख अनुमान गरिएको थियो ।

रिसोर्टमा ७२ कोठा हुनेछ । सुरुवाती लागतको तुलनामा रिसोर्टको लागत ७८ प्रतिशत बढेको छ । यसअघि ३१ प्रतिशत बढ्ने अनुमान गरिएको थियो । रिसोर्टले २०२५ देखि ऋण तिर्न थाल्ने अनुमान गरिएको छ ।

दुसित थानी हिमालयन रिसोर्ट ब्रान्डमा सञ्चालन हुने भएको छ । उक्त रिसोर्ट दुसितको ग्लोबल रिजर्भेसन सिस्टम प्रयोग गरिने छ । जसले गर्दा रुम अकुपेन्सी र आम्दानीमा सकारात्मक प्रभाव पर्ने देखिन्छ ।

दुई कम्पनीबीचको सम्झौताअनुसार दुसित थानीले रिसोर्ट सञ्चालनका लागि सम्पूर्ण व्यवस्थापन पनि सम्हाल्ने छ ।