काठमाडौं । प्रतिनिधि सभा विघटन गरेको विरोधमा शनिबार प्रमुख प्रतिपक्षी दल नेपाली कांग्रेसले देशका ७ सय ५३ स्थानीय तहमा विरोध प्रदर्शन गर्न लागेको छ ।

कांग्रेस सभापति शेरबहादुर देउवाले ७ सय ५३ स्थानीय तहमा शनिबार हुने विरोध प्रदर्शनमा सहभागी हुन सबैमा अपिल गरेका छन् । विज्ञप्तिमार्फत देउवाले संविधानमा भएको व्यवस्था प्रतिकूल, जनभावना विपरीतको कार्यविरुद्ध कांग्रेस एकमतका साथ उभिएको बताएका छन् । 

पुस १९ गते बसेको कांग्रेसको केन्द्रीय समिति बैठकले संसद विघटनविरुद्ध तीन दिन प्रदर्शन गर्ने निर्णय गरेको थियो ।

पुस २५ गते ३ सय ३० प्रदेश सभा निर्वाचन क्षेत्र, माघ ३ गते ७ सय ५३ स्थानीय तह र माघ ८ गते ७ सय ५३ पालिकाहरुका ६ हजार ७ सय ४३ वडाहरुमा विरोध प्रदर्शन एवं सभाको आयोजना गर्ने निर्णय गरेको थियो ।

निर्णय अनुसार यसअघि कांग्रेसले पुस २५ गते ३ सय ३० प्रदेश सभा निर्वाचन क्षेत्रमा र पुस १३ गते १ सय ६५ निर्वाचन क्षेत्रमा‍ विरोध प्रदर्शन गरिसकेको छ ।

कांग्रेस सभापति देउवाले प्रतिनिधिसभा विघटनको विरोध गरे पनि सरकारको कदमविरुद्ध सर्वोच्च अदालतमा मुद्दा विचाराधीन रहेकाले अदालतको फैसला पर्खिनुपर्ने बताइरहेका छन् । कांग्रेसका अन्य नेताहरु भने प्रतिनिधिसभ पुन: स्थापनाका लागि आन्दाेलन गरिरहेका छन् ।