उकालो यात्रामा सुन, सोमबार पनि मूल्य बढ्यो

सुनौलो नेपाल

सोमवार , पौष २९, २०८१

उकालो यात्रामा सुन, सोमबार पनि मूल्य बढ्यो

काठमाडौँ । नेपाली बजारमा आज सोमबार पनि सुनको मूल्य बढेकोा छ । आज सुनको मूल्य तोलामा १ लाख ५६ हजार रुपैयाँ नजिक पुगेको छ।

नेपाल सुनचाँदी व्यवसायी महासंघका अनुसार छापावाल सुनको मूल्य तोलामा १ लाख ५५ हजार ८०० रुपैयाँ कायम भएको हो ।

अघिल्लो दिन छापावाल सुनको मूल्य तोलामा १ लाख ५५ हजार ७०० रुपैयाँ कायम भएको थियो । पछिल्लो समय सुनको मूल्य वृद्धि भइरहेको छ ।

पुस २२ गते तोलामा १ लाख ५२ हजार रुपैयाँ कायम भएको सुनको मूल्य सोमबारसम्म आइपुग्दा ३ हजार ८०० रुपैयाँ बढिसकेको छ ।

केही समयअघि सरकारले भन्सार घटाएसँगै सुनको मूल्य ह्वात्तै सस्तिएको थियो । तर केही दिनदेखि सुन उकालो यात्रामा छ । पछिल्लो समय अन्तर्राष्ट्रिय बजारमै वृद्धि भएकाले त्यसको प्रभाव नेपाली बजारमा परेको व्यवसायीहरु बताउँछन् ।

आज सोमबार चाँदीको मूल्य भने स्थिर रहेको छ । आइतबार तोलामा १ हजार ८६० रुपैयाँ कायम भएको चाँदीको मूल्य सोमबार पनि सोही मूल्यमा कारोबार भएको महासंघको भनाइ छ ।