भारत र चीनको सैनिकबीच सिक्किमको सीमाना नजिक झडप

सुनौलो नेपाल
सोमबार, १२ माघ २०७७

3.5K

काठमाडौं । भारत र चीनको सैनिकबीच सिक्किमको सीमा नजिक झडप भएको छ । झडपको पुष्टि भारतीय सेनाले गरेको बीबीसी हिन्दीले उल्लेख गरेको छ ।

भारतीय सेनाले आफ्नो बयानमा भनेको छ ‘उत्तर सिक्किमको नाकुला इलाकामा २० जनावरीमा भारतीय सेना र पीपुल्स लिबरेशन आर्मीबीच सामान्य झडप भएको छ । यो मामला स्थानीय कमाण्डरहरुको नियमानुसार सुल्झाइ सकिएको छ ।’

यसअघि समाचार एजेन्सी एएफपीले भारतीय मिडियामा छापिएको रिपोर्टको हवाला दिएर झडपमा २ पक्षका सैनिक घायल भएको बताएको थियो ।

उत्तरी सिक्किमको नाकुला सीमामा चिनिया सैनिक भारतीय सीमातर्फ आएपछि विवाद सिर्जना भएको थियो ।

भारतीय मिडियामा प्रकाशित समाचार अनुसार झडपमा करिब २० चिनिया सैनिक घायल भएको र चार जना भारतीय सैनिक घायल भएको बताइएको छ । तर चिनिया सरकार समर्थित न्युज वेबसाइट ग्लोबल टाइम्सले भने भारतीय मिडियामा आएको रिपोर्ट झुठो भएको बताएको छ ।